Bi estreinaldi eta hiru antzezlan ikusteko aukera izango da datozen egunetan

Pasa den urriaren 15ean hasi ziren 39.ez Euskal Antzerki Topaketak Azpeitian, Atx teatroaren 'Lubaki lainotsua' obraren estreinaldiarekin eta aste honetan jarraituko du egitarauak. Antzerkizaleek hainbat lan ikusteko aukera izango dute datozen egunetan. Gaur, ostegunean hasi eta astelehenera, azaroaren 1era bitartean, bi obra estreinatuko dira eta beste hiru lan ikusteko aukera izango da, bi Soreasu antzokian -estreinaldiez gainera- eta bestea herriko Plazan, kale antzerkia baita. Ondoren, programazioak azaroaren 4an jarraituko du eta 14an itxiko da aurtengo antzerki sorta emanaldia.

Beraz, bost emanaldi izango dira guztira egun hauetan. Gaur bertan lehena. Ze onda Antzerki taldeak 'Tempus fugit' lana estreinatuko du 19:00etan, Soreasu antzokian. Dinamoa Sormen Gunean egindako zenbait egonalditan ondutako lana da Tempus fugit.

Bigarren estreinaldia igandean, urriaren 31n izango da. Kamikaz kolektiboak eta Ttak teatroak landu duten 'Hiru kortse, azukre asko eta brandy gehiegi' obraz gozatzeko aukera izango da, arratsaldeko 19:00etan baita ere. Erika Olaizola, Iraia Elias eta Amancay Gaztañagak zuzendutako obra da.

Estreinaldiez gainera, bihar, ostirala ere izango da taula gaineko arteaz gozatzeko parada Artedrama arte eszenikoen plataformaren eskutik. 'Amua' lana eskainiko dute Soreasun. Anak (Maite Larburuk), bere gaztaroko bi maitale ohi gonbidatuko ditu Iratiko etxola batera. Asteburu bat igaroko dute bertan, izan zirenaren eta amestu zutenaren izenean.

Zapatuan, haur eta helduentzat tartea izango da, hortik ordutegi aldaketa. Arratsaldeko 17:00etan da emanaldia. Gorakada teatroak 'Zuhaitzak landatzen zituen gizona' taularatuko du.

Azkenik, topaketetako lehen aste indartsu honetan, astelehenean, azaroaren 1ean, kale antzerkia ere izango da. Xabier Larreak 'Up!' ikuskizuna ekarriko du herriko plazara.

Sarrera behar duten emanaldi guztien prezioa 5 eurokoa izango da.

Bestalde, astelehenetik, azaroaren 1etik 15era bitartean Corrado Masacciren txotxongilo tailerra eta erakusketa zabalduko dira Foru ibilbideko udal aretoan. Goiz eta arratsaldez izango da zabalik.