Azpeitia

Itsasi Eguna ospatuko da larunbat honetan

Itsasi Euskal Kultur Taldeak, urtero egin ohi duen bezala, taldeko eguna ospatuko du larunbat honetan, azaroaren 23an. 11:15ean taldeko dantzari txikiak Frontoi Txikin elkartuko dira eta hortik abiatuta, alde zaharreko hainbat tokitan dantzak eskainiko dituzte. Besteak beste, Perez Arregi plazan, Plaza Txikian, Olazko Amaren plazan eta enparantza nagusian izango dira. Horren ondoren, taldeko kide zein kide ohiek bazkari batekin emango diote jarraipena egunari. Eguraldi txarra izanez gero, dantza ekitaldia frontoian izango da.

Itsasiko kideek taldekide ohi guztiak gonbidatu eta animatu nahi dituzte parte hartzera. Interesa dutenek, Itsasiko kideren bati esan edo Itsasiko emailera (itsasieuskalkulturtaldea@ gmail.com) idatzita eman dezakete izena.