Txapeldun ugari, Azkoitia eta Azpeitia artean

Milatik gora lagun zeuden izena emanda Azkoitia-Azpeitia Diego Garciaren omenezko maratoi erdian parte hartzeko. Giro ezin hobearekin, 950 lagunek osatu zuten balentria eta horietatik asko eta asko izan ziren herritarrak. 132 azpeitiar ziren tartean eta 93 azkoitiar.

21 kilometroko proban Imanol Larrañaga izan zen lehen azkoitiarra (1:08:29) denbora egin eta gero; eta Miren Murua , berriz, lehen emakume azkoitiarra, 1:29:36ko denborarekin. Aldiz, Jabier Egiguren (1:13:19) eta Ane Alberdi (1:25:15) izan ziren lehen azpeitiarrak.

Handbike proban Bidania-Goiazko Jon Galarraga nagusitu zen (58:44) Asier Navaridasen eta Mikel Goikoetxearen aurretik.

Maratoi erdiaz gainera, Azkoitia-Azpeitiak 8 km.-ko proba laburra ere izan zuen. Estreinakoz, gainera, emakumezkoen partaidetzak gizonezkoena gainditu zuen. Jokin Bellidok eta Uxue Mardarazek irabazi zuten.

Herritarren artean Julen Azpiazu eta Ilaski Odriozola izan ziren lehenak. Azkoitiarren artean, berriz, Marcos Zaldibia eta Andrea Muñoz nagusitu ziren.

Beti izan ohi da azken ezusterkoren bat antolakuntza erraldoiak eskatu ohi dituzten ikuskizunetan eta atzokoan ere izan zuten bat. Azkoitia-Azpeitia maratoi erdiko antolatzaileak sinestu ezinik zeuden. Azken momentuan, korrika egitera etortzekoak ziren emakume afrikarrak, proba irabazteko faboritoak, ezin izan ziren iritsi. Beraz, bost atletaren hutsune handia izan zen. Salome Kipruto zen, sasoian iristen bazen behintzat, antolakuntzako kideek txapela janzteko begiak ipinita ziuten lehen emakumea, Tekan Berhe, Genet Nirea eta Abezu Aschale gaztearekin batera. Hauen faltan, Irene Pelayo zen aukera nagusia eta espainiarrak ez zuen hutsik egin. 1:13:36ko denborarekin estreinako postua lortui zuen Santanderko korrikalariak. Elena Loyo gasteiztarra izan zen bigarrena, 1:16;20ko denborarekin. Hirugarren postuan berriz, Patricia Alvarez asturiarra helmugaratu zen (1:21:20).

Gizonezkoetan, Theophilus Kipsang gazteak sorpresa eman zuen, 1:02:06an itxi zuen kronoa: Atzetik, Johana Erot (1:02:16) eta Azpeitian hain ezaguna den Mark Kiptooren aurretik.

49 urterekin 1:03:38 egin zuen Kiptook. 45urtez gaindikoen marka haustera zetorren keniarra, 1:01:28 ko langa jaistera, hain zuen ere, baina ezin izan zuen denbora hori gainditu. Hirugarren postuarekin, podiumera igotzea lortu bazuen ere, Hala ere, ahoan irribarrea ez zuen kendu Azkotia-Azpeitian hain maitatua den korrikalariak.

Mikel eta Iñaki Etxaniz anai urretxuarren laguntzarekin iritsi zen Theo Kipsang atleta kenyarra. Azaroan iritsi zen Europara eta Valentzian bere lehen maratoia egin zuen. Helburua profesional izateko bidean lehen pausoa ematea zen. Bertan egindako lan onari esker (maratoia bi ordu eta 10 minututan egin zuen), Joma taldeak fitxatu du eta Azkoitia-Azpeitia maratoi erdian gainera txapela jantzi du. Datorren astean Madrilen izango da eta udazkenean Europara etorriko da berriro, maratoi bat egitera.

Azkoitia-Azpeitia maratoi erditik mundura ateak zabaldu zaizkio 28 urteko gazteari.

• Temas
• Azkoitia
• Azpeitia