Getaria

Ulpiano Etxean ikasgela eraikitzeko obrak martxan dira

Gaur eguneko ikasgelak leku berria behar zuela jakinekoa zen. Kultur etxean dauden zerbitzu batzuk sortzen dituzten baldintzak ez ziren bateragarriak eta egoera honen aurrean Udalak ikasgelaren zerbitzua beste lekuren batean kokatzeko ardura hartu zuen.

Zarautz jauregian erabilpen anitzetarako areto berria martxan jarrita Ulpiano aretoak ikasgela funtzioa bete zezakeela pentsatu zen. Leku lasaian kokatuta dagoen aretoa da, bertan dauden bestelako zerbitzuek ez die eragiten, argitasuna du etab.

Udaleko teknikoek aukera desberdinak aztertu dituzte eta Ulpiano aretoa Ulpiano ikasgela bihurtzeko proposamen teknikoa egin. Zati bat biltegi bezala erabiltzeko egokituko da eta gainontzekoa ikasgela izateko. Bertan hainbat esku-hartze egingo ditu Udalak. Hala nola, zorua egokitu, altzariak erosi, sartu-irten sistema elektronikoa jarri, elektrizitate lanak... Obra honen kostua 23.213,96 eurokoa izatea aurreikusten da.

Esku-hartzeak otsailean zehar egitea aurreikusten da. Ireki eta erabiltzeko prest dagoenean bere berri emango zaie gaur egungo erabiltzaileei eta gainontzeko herritarrei ere.