Zarautz

«Narrazioak lehen esalditik harrapatzen du irakurlea»

Yolanda Arrieta eta Nerea Loiola idazleak eta Amaia Serrano EHUko irakasleak osaturiko epaimahaia sari banaketan harturiko erabakiaz azaldu zen: «Euri eta ateri narrazioak lehen esalditik harrapatzen du irakurlea. Egoerak gain eginda dagoen pertsonaia baten ezinegona agertzen du, dramatismo orotik urrun, umorea eta ironia bidelagun hartuta, dotore, fin eta trebe».

«Hizkuntza maila paregabea erakusten du testuak, literatura darie bertako onomatopeia, hitz joko zein egoera surrealistei. Erritmo bizia du kontakizunak, eta narratzaileak aise darama irakurlea bizipen batetik bestera, saltoka eta itzulipurdika, etenik gabeko jolasean. Idazleak darabilen estiloak arindu egiten du pertsonaiak bizi duen zama, eta arnasa horrek testua hasieratik amaieraraino irribarrez irakurtzera bultzatzen du».

Epaimahairen esanetan, «haurrentzako kontakizuna izanagatik, hainbat geruza erakusten ditu, eta horregatik esan dezakegu 'Euri eta ateri' lanak agerian jartzen dituela Haur Literaturari dagozkion duintasuna eta maila gorena».