Bertso afaria ekainaren 20an Jagoba Arrasate agurtzeko

Ez da txikia Jagoba Arrasatek Iruñean egin eta lortutakoa Osasuna entrenatzaile bezala. Zelai barnean kirol emaitzen aldetik, baina kanpoan ere eta horregatik lortu du talde gorritxoaren zaletuen halako babesa. Ligako azken partidan Sadarren bizi ziren uneak eta Arrasatek berak bota zuen bertsoa dira erakusle onena.

Behin futbola amaituta, Osasunako hainbat peñak osatuta Sadar Bizirik plataformak eta AEK-k bertso afaria antolatu dute ekainaren 20rako entrenatzaileari merezitako agurra eskaintzeko. Amets Arzallus, Julio Soto, Urko Gartzia eta Arrasate bera izango dira Antsoaingo frontoian arratsaldeko 20:00etan. Sarrerak 20 euroko prezioa izango dute eta aurrez eskuratu ahalko dira AEKren San Juan (Irrintzi), Alde Zaharra (Iruñezar)eta Berriozarreko (Auzalor) euskaltegietan edota 649 34 64 51 telefono zenbakian.

«Ekimen honen helburua klubaren balio historikoak errespetatuko dituen Osasuna aldarrikatzea ere bada, bere zaleak eta dagozkion eskubideak lehen planoan jarriz. Errotuta dagoen kluba da, herrikoia eta gaur egun futbolaren ezaugarri diren makrointeresetatik urrun dagoena. Euskaraz ere biziko den kluba », diote.