Euskal zinemako 12 film ikusgai Montrealen

Irailaren 9tik 24ra euskal zinemako 12 film ikusgai izango dira Saison Québec-Pays Basque egitasmoaren baitan Montrealen, Etxepare Euskal Institutuak eta Quebeceko Kultura eta Komunikazio Ministerioak bideratu ekimenean. Pasa den apirilean Donostian eta Bilbon Quebeceko zine zikloa egin ostean –ekoizpen garaikidea izan zuen ardatz nagusi– Euskadiko Filmategiak eta Cinémathèque Quebecois erakundeak euskal zinema zikloa antolatu dute egunotarako.

Besteak beste Montxo Armendarizen 'Tasio' (1984), Julio Médemen-en 'Vacas' (1992), Roberto Castón-en 'Ander' (2009), Asier Altunaren 'Amama' (2015), Lara Izagirreren 'Un otoño sin Berlín' (2015), Iratxe Fresnedaren 'Irrintziaren oihartzunak' (2016), Jon Garaño eta Aitor Arregiren 'Handia' (2017), Telmo Esnalen 'Dantza' (2018), Koldo Almandozen 'Oreina' (2018), Fermin Muguruzaren 'Black is Beltza' (2018), Imanol Rayoren 'Hil Kanpaiak' (2020) eta Mireia Gabilondoren 'Erlauntza' (2020) proiektatuko dira.

Saison Québec-Pays Basque Quebeceko eta Euskadiko hiri nagusietan garatzen ari den programa kultural eta artistikoa da, eta joan-etorriko izaera dauka. Euskal kultura eta sorkuntza garaikideari Quebecen leiho bat irekitzea da helburua eta, era berean, Quebeceko sortzaileen lana Euskadin erakustea, hizkuntza, kultura eta artearen bidez bi herrialdeen arteko harremana estutzea jomuga.

Etxepare Euskal Institutuak eta Quebeceko Kultura eta Komunikazio Ministerioak bideratu dute ekimena. Scotland Goes Basque programaren lekukoa hartu behar zuen 2020an, baina azkenean 2021 eta 2022 artean gauzatzera doa. Ekimenak, kultura, sorkuntza garaikidea eta hizkuntza ardatz hartuta, diziplina anitzeko eskaintza zabala aurreikusten du, beti ere covid-19ak eragindako egoeraren bilakaerari lotuta.