'31 eskutik' bloga berrabiarazi du EIZIEk

Euskal Itzultzaile, Zuzentzaile eta Interpretatzaileen Elkarteak (EIZIE) euskararen erabilerari buruz aritzen den '31 eskutik' bloga berrabiarazi du. Astean hirutan testu bat argitaratuko dute taldea osatzen duten 31 idazlek; astelehenetan, asteazkenetan eta ostiraletan, hain zuzen ere.

'31 eskutik' blogak duela hamaika urte hasi zuen ibilbidea, 2012an, eta 2016a arte etenik gabe egin zuen lan. Orain, zazpi urteko atsedenaren ostean -«loaldi luze bat», atariak esan bezala-, Estitxu Irisarrik estreinatu du etapa berri hau 'Ze suma, sobra ere' artikuluarekin. «Berri pozgarria, inondik ere' sustatzaileen aburuz.

Ekimenaren bigarren etapan «gure pantailak euskararen erabilerari buruzko testu jakingarri bezain gustagarriz» betetzeko asmoa du EIZIEk blogan zenbait berrikuntzarekin: webgunearen itxura, artikuluen maiztasuna, eskuak, etab. Era berean, kolaboratzaile batzuk berriak dira.

Denboraldi berriaren lehen artikulua Estitxu Irisarrirena izan da, 'Zer suma, sobra ere' izenekoa. Artikulu horretan, goierritarrek erabiltzen dituzten 'zer suma' eta 'sobra ere' esapideei buruz hitz egiten du. Ostean, asteazkenean, Jose Ignacio Hualdek Leizarragari buruzko 'Daviden psalmuac Leiçarragaren erara' artikulua plazaratu zuen; eta, azkenik, Oskar Arana Ibabek, 'Geroaldi perfektua' izenekoa. Hiruak jada eskura daude blogean.

Blogaren helburu nagusiak, besteak beste, hauek dira: nork bere ekarpenak egitea, gogoeta egiteko eta proposamenak egiteko aukera ematea, eta elkarrizketa sorraraztea.