Joxe Ramon Zubimendi idazle eta hizkuntzalaria hil da

Joxe Ramon Zubimendi Imaz (Usurbil, 1952) euskal idazlea eta hizkuntza-aholkularia astearte honetan hil zen. 1994 eta 1996 urteen bitartean hedabide honetan kolaboratu zuen eta 1997an bildu zituen 'Bidezkoak' (Sendoa, Auspoa bilduma) liburuan. Euskaltzaindian egin zuen lan nekaezina nabarmentzekoa da. Hala, 1996an akademiak euskaltzain urgazle izendatu zuen eta, era berean, 200 urtetik Jagonet kontsulta- eta aholku-zerbitzuaren arduradun izan zen.

1980. urteaz geroztik lan handia egin zuen euskarazko hedabideetan euskararen kalitatea eta egokiera ikuskatzen eta bideratzen, hizkuntza-arduradun, bikoizketa-zuzendari, gidoigile, aktore, itzultzaile, esatari eta gainbegirale lanetan. Euskadi Irratiak eta HABEk eragindako Antzoki iluna sailaren zuzendari izan zen; sail horretan Bernardo Atxagaren nobelak irratirako egokitzen eta irratsaio horiek zuzentzen egindako lanagatik, 1990ean Argia Saria eskuratu zuen. Horretaz gain Antonio María Labayen eta Toribio Alzagaren antzezlanak eta José Antonio Loidiren eta 'Ataño'-ren beste testu batzuk egokitu eta zuzendu ditu irratirako.

Irakasle-lanetan ere aritu zen eta 1993an, Pello Esnalekin batera idatzitako 'Idazkera-liburua' (Eusko Jaurlaritza) argitaratu zuen, kazetaritza-estiloarekin eta beste idazketa-mota batzuekin zerikusia zuten gaiak jorratzen zituen lana. Ildo beretik heldu zen bi urte geroago, «osagarri» modura 'Jokaera-liburua' (Sendoa, 1995) komunikazio zuzen eta eraginkor baten ezaugarrietan sakontzen duena. Trilogia modukoa itxi zuen, berriro ere Pello Esnalekin elkarlanean, 'Irakurbideak' (Sendoa, 1997) liburua kaleratzean, idazle klasikoen eta euskal literatura herrikoiko beste idazle batzuen testuen bilduma komentatua, guztiak euskara batura pasatuak

Ez zen jorratu zuen esparru bakarra izan. Usurbilen jaio, Zubietan bizi izan zen urte luzez eta inguruarekiko arreta hori islatu zuen 'Zubieta: mila urteko herria' (Donostiako Udala, 2000) Donostia eta Usurbil udalerrien mende dagoen enklabeari buruzko historia jasotzen zuen liburuan. Zubimendik berezko nortasuna duela defendatzen zuen.

2009an kaleratu zuen 'Gipuzkoa, Mari-lur, Tierra de Mari', euskal mito zaharrak, bereziki Gipuzkoaren sorrerari buruzkoak, interpretatzen zituen liburua, Gipuzkoako Foru Aldundiak eta Elkar argitaletxeak babestua. Bertan «euskaldunok hartzetik jaisten gara (eta ez tximinotik )», eta «gure arbaso komuna zuhaitza da» bezalako ondorioak aurkeztu zituen.