Etxeko soinuekin irudimenezko munduetan barrena bidaiarazten duen single-a

Gero eta gutxiago falta de Belako talde bizkaitarrak estudioko bosgarren diskoa aurkezteko. Irailaren 8an izango da entzungai 'Sigo regando' albuma eta, bien bitartean, itxaronaldia arinagoa egiteko eta zaleek zer entzun izan dezaten, hirugarren aurrerapen single-a plazaratu dute ostiral honetan: 'Orein Orain'.

Single horrek etxeko soinua du, eta, aldi berean, oreinez, hodeiz eta hiri fantasmaz betetako irudimenezko munduetan barrena bidaiarazten gaitu. Unibertso honetan behin izan zenaren forma berriak ezkutatzen dira.

Oraingoan ere, Josu Billelabeitia gitarra-jotzaileak ekoitzi du 'Orein Orain'. Bertan, vocoder efektuak erabiltzen dituzte ahotsetan, ingelesa eta bere jaioterria, euskara, nahasiz, pop giro gozo eta onirikoetara garraiatzeko, baxu inguratzaile eta gitarra fin eta trinkoekin.

'Plastic Dream' diskoaren birarekin bi urteko bira egin eta 2023ko urtarrilean Aiako Probalekuan azken kontzertua eskaini ostean estudioan igaro dituzte asteak Belako taldeko kideek. Bira luzea izateaz gain arrakastatsua eta oparoa izan zen, besteak beste Europa iparraldeko hainbat hiri -Alemanian Frantzian, Danimarkan, Polonian edo Finlandian- bisitatu zituztelako, baita Mexiko, AEBak edo Ingalaterra ere. Nola ez, inguruko festibaletako programazioan tartea ere izan zuten, hala nola Aranda de Dueroko Sonoraman.

Horren ostean, uda hasieran, heldu zen nolabaiteko sorpresa 'White Lies' kantuarekin. Gitarra barrokoez, piano-doinuez eta Ruta 66ren amaiera duinaz beteriko benetako pop iruditeria jokoa eskaini zuen; eta aste batzuk geroago, lehen aldiz gaztelaniaz 'Sangre Total' basatia bota zuten.

Nahi duen orok diskoaren aurre eskaria egin dezake bai taldearen webgunearen bitartez zein musika salmentarako denda fisiko eta birtual handien bitartez. Honek, kantuez gain, errealitate birtualeko kontzertu bat dakar. Eta «esperientzia osoagoa» izateko asmoz beste eduki mordoa ere eskainiko ditu. Esaterako, errepertorio osoa interpretatzen ikusi ahal izango duzu, zure lagunekin komentatzen dituzun bitartean.

• Temas
• Belako