Bavariarrak, garaile segako apustuan euskaldunen aurka

Bavariarrak izan ziren garaile euskaldunen aurka Hernaniko Jauregi jatetxean Almitza elkarteak antolatutako segako apustuaren gizonezkoen proban. Alemaniatik etorritako segalariek 3.201kg ebaki zituzten eta euskaldunek, 3.137kg. Amaiur Arrospide leaburuarra eta Josu Mendizabal zaldibiarra lehiatu ziren Johannes Egger eta Johann Wolfgruber bavariarren aurka.

Emakumeen proban, Izadi Arrospide leaburuarra izan zen garaile (5:48.26). Maide Garmendia zaldibiarra izan zen bigarrena (6:12.50) eta Veronika Abfalter bavariarra, hirugarrena (7:02.56)

Gasteizeko Iradier Arenak aizkolarien Euskal Herriko txapelketaz gozatuko du bihar goizeko hamabietatik aurrera (ETB-1). Iker Vicente otsagabiarra izango da txapela hirugarren aldiz irabazteko faborito nagusia eta Hodei Ezpeleta eibartarra, Julen Gabirondo urnietarra, Jokin Urretabizkaia 'Basozabal' donsotiarra eta Andoni Iruretagoiena 'Izeta VI.a' aiarra izango ditu aurkari nagusiak. Aizkolariek Iratiko Basotik ekarritako tamaina ezberdineko hamabi enbor moztu beharko dituzte. Tartean, Arabako Herri Kiroleko Federazioak Kerman Pérez Euskal Herriko txinga txapeldunak eta Jon Lapazaranek burutuko duen fardoen altxatze eta jaurtiketa erakustaldia izango da.

Atzo Balmasedan, Julen Alberdi 'Txikia' (11:23), Mikel Larrañaga (12:19) eta Eneko Saralegi (15:00) azaroaren 24ko Bigarren Mailako aizkolarien txapelketarako sailkatu ziren.