Jon Ander Albisu: «Grebari esker pilotariei errespetu handiagoa izatea lortu dugu»

-Zer lortu zenuten?

-Pilotariei errespetu handiagoa izatea. Ondoren elkarrizketa gehiago izan dira eta etorkizunean ere horrela jarraitzea nahi nuke. Hitz eginda konpontzen dira arazoak.

-Lorpen txikia zenbaiten ustez.

-Denetarik entzun dut, baita grebarik ez genuela egin behar ere. Zenbait gai konpondu genituen eta Baikotik kanpo geratu ziren lau kidek enpresetan pilotan jokatzen jarraituko dute.

-Aldagelan zauririk utzi al du?

-Bakoitzak bere gauzak ditu. Egunero elkar ikusten dugu eta, oro har, ondo gaude.

-Nola doa Aspeko pilotariekin batera sortutako elkartea?

-Pandemiak zailago egiten du biltzea. Enpresekin eta Borja Osésekin elkartu ginen eta gure kezkak azaldu genizkien. Hilabete bat edo bi barru berriz hitz egitekotan gara.

-Ba al duzue pilotarien arteko bilerarik eta ekimenik?

-Elkartea sortzeko lanetan jardun dugu orain arte. Agiri asko eskatzen dituzte. Sei lagun gaude zuzendaritza batzordean, enpresa bakoitzetik hiru.