Aurrelaria, gipuzkoarra, Aspekoa eta sendoena

Osasun kontuez asko hitz egin da, tamalez, aurtengo Buruz buruko txapelketa nagusian. Eta ez bakarrik iazko martxotik bizi izan dugun guztia bezalaxe hau ere Covid-19aren pandemiak baldintzatuta jokatu behar izan delako -ikuslerik gabe, besteak beste-. Baita osasun arazoak medio azken urteetako bi txapeldun, Erik Jaka eta Iker Irribarria, etxean geratu behar izan direlako. Baina, batez ere, zorigaiztoko lesio batek Iñaki Artola bere lehen Buruz buruko finala jokatzeari uko egitera behartu duelako. Kantxan lortutakoa horrela galtzea pena izan da.

Alabaina, beste hainbat mugarri ere utziko ditu historiarako 2021eko txapelketa honek. Horietako bat, zalantzarik gabe, Jokin Altunaren konfirmazioarena. Inor ez da harritzen jada amezketarra final batean ikusteaz, alderantziz. Ia ezinbesteko-tzat jotzen da, banakako azken zortzi finaletako zazpitan egon baita; Buruz buruko azken lau txapelketetan hirutan lortu du Jokinek finalerako txartela, bi txapel jantziz. Aspaldian erregulartasun handia erakusten ari da kantxan eta distantzia batera zein bestera inor baino hobeto moldatzen dela agerian geratu da. Kanporaketetan nagusitasunez gailendu zitzaien Ezkurdiari eta Zabaletari, joko handia eskainiz, eta atzo ez zion aukerarik eman Beñat Rezustari. Hamaika tanto egin dizkiote atzelari bien artean.

Beste bi pilotarik ere sortu dute zeresana. Horietako bat Zabaleta bera da Axier Arteagari eta Daríori aise gailendu baitzitzaien nafarra (sei eta bost tantotan utzi zituen), itxura ona emanez. Eta bestea, noski, Artola. Bere jokoan aurrerapausoa eman du alegiarrak eta onenen artean egon daitekeela berretsi, azken unean zorteak muzin egin badio ere. Etorkizunean final gehiago jokatzeko aukera izan dezakeela dirudi.

Aipatzekoa, baita ere, atzelariek izan duten papera. Aspalditik esaten da ez dutela zereginik Buruz burukoan (azken txapelduna Patxi Ruiz izan zen 2003an, eta 2008tik ez zen bakarra finalerako sailkatzen), baina finalaurrekoetan bi izan ditugu aurten, eta horietako bat finalean ere sartu da, bere bidea ohikoa izan ez den arren.

Hori bai, azken hemezortzi txapelketetan bezalaxe, garailea aurrelari bat izan da. Eta azken lau edizioetan bezalaxe, Aspekoa eta gipuzkoarra. Enpresen arteko lehian aldea handituz doa Asperentzat, azken hamabi titulu handiak eskuratu baititu, buruz burukoan, bikoteka eta lau t'erdian.

Bukatzeko ezin aipatu gabe utzi Peio Etxeberriak bigarren mailako txapelketan egindako lan aparta. Lehen mailan lekua izan zezakeen arren, bigarren mailan jokatzea onartu eta txapela eskuratu du. Lehen mailako pilotaria dela egiaztatu du zenoztarrak.