Hautesleak mugiarazteko mugimendua behar

Populartasuna.

Lehendakarigaiak aldatu dituzte alderdi gehienek –berrikuntza horretan gizonen alde eginda–, eta kanpaina-arduradunak burubelarri dabiltza jendaurrean ezagutzera emateko, hautesleak izen eta aurpegi berriekin ohitu daitezen. Ingurukoen artean egindako 'galdeketa' azkar batek oraindik ere aurretik lana dutela pentsarazten dit. Askok profil indartsuagoen falta sumatzen dutela esango nuke. Alabaina, ospe handirik ez izan arren, bi hautagai nagusiek nota ona lortu dute CISen inkestan. Edo horrexegatik ote?

Alamena.

Hala itzultzen du Elhuyarren hiztegiak 'tabarra' hitza, azken egunetan, Kopako finalaren osteko ospakizunen harira, sare sozialetan bolo-bolo dabilena. Bada, herritar askorentzat horixe bera dira hauteskundeak –zortzigarrenak azken bost urteetan–, kanpainak, politikarien agintzak... Duela lau urte (pandemia tarteko) %49,69koa izan zen abstentzio tasa; azken udal eta foru hauteskundeetan %39,89koa. Zifra horiek jaistea erabakigarritzat jotzen dute alderdiek. Astebete dute hautesleak motibatu eta mugiarazteko.