'Arnasa Gara', arnasguneek euskararentzat duten garrantzia nabarmentzeko kanpaina

Euskararen arnasgune batean, Etxarri Aranatzen, aurkeztu dute Eusko Jaurlaritzak, Nafarroako Gobernuak eta UEMA Udalerri Euskaldunen Mankomunitateak, herriko Udalarekin batera, 'Arnasa Gara' ekimenaren kanpaina berri bat. «Euskararentzat arnasguneak diren udalerriak zein bertako herritarrak ahalduntzea» eta «arnasguneek euskararen biziberritzean duten garrantzia» nabarmentzea du helburu martxoaren 22an abiatuko den kanpainak, zortzi bideo laburretan oinarrituta zortzi astez luzatuko dena.

Arnasguneak dira, hain zuzen, «hiztun komunitate sendo bati esker, euskaraz modu naturalean bizi daitezkeen udalerriak»; hau da, «arnasgune diren herrietan euskararen presentzia nagusia da eta herritarrek euskaraz egiten dute haien eguneroko bizimoduan.» Horregatik dira arnasgune, «euskarak aske hartu dezakeelako arnasa espazio horietan, bizi-bizi». Hori horrela izanik, egon badago dago arnasguneetako herritarren hizkuntza-ohituren inguruko kezka. Ekimenaren helburua da, hain zuzen, arnasguneetako herritarren hizkuntza ohituren inguruan gogoeta egitea.

Aurkezpenean izan dira Eusko Jaurlaritzako Kultura eta Hizkuntza Politika sailburu Bingen Zupiria, Nafarroako Gobernuko Herritarrekiko Harremanetako kontseilari Ana Ollo, UEMA-Udalerri Euskaldunen Mankomunitateko lehendakari Iraitz Lazkano eta Etxarri Aranazko alkate Silvia Marañon. Bingen Zupiriak adierazi duenez, «arnasguneei euskararen biziberritze prozesuan duten garrantzia eman eta zaintzen jarraitu nahi duen programa bat da» ekimena. Gainera, Zupiriak hizkuntza politikaren arloan erakunde desberdinen artean ematen den lankidetza ere azpimarratu du.

Nafarroako Gobernutik Ana Ollo Herritarrekiko Harremanetako kontseilariak bestalde azpimarratu du «Nafarroako Gobernuak arnasguneek duten garrantzia azpimarratzea eta euskal komunitatea indartzea du xede. Neurri batean, denok baitugu gure hizkuntza jokaera aztertzeko eta dugun jokabideaz kontziente izateko beharra». UEMAko lehendakari Iraitz Lazkanok, berriz, «arnasguneen aitortza eta arnasguneak sendotzea UEMAren izaeraren oinarrian dagoen zerbait» dela nabarmendu du eta, beraz, 'Arnasa gara' kanpaina bereziki garrantzitsua dela UEMArentzat. «UEMAk urte askoan esan eta aldarrikatu duena gaur egun hainbat erakunde publikok ere onartzen eta zabaltzen dutela ikustea ederra da».

Kanpainaren euskarri nagusia zortzi bideo labur dira (minutu batekoa bakoitza), eta esketx erara bertan lantzen diren diskurtsoak, batez ere, arnasgune edo eremu oso euskaldunetako herritarrei zuzenduta daude. Dena den, Ekimenak arnasguneetatik kanpo bizi direnengana iristeko asmoa ere badauka, arnasguneen errealitatearen ezagutza eta herri hauek euskararen biziraupenean duten garrantzia azpimarratzeko eta errekonozimenduan jartzeko.

Bideo bakoitzak egoera bat irudikatzen du eta «kanpainaren asmoa da egoera horien inguruko sentsibilizazio lanketa bat egitea sare-sozialen bidez». Besteak beste, arnasguneetako pertsona erreferenteei (aktore, musikari, kirolari) elkarrizketak egingo zaizkie, gaiaren inguruan hausnartzeko. Kanpainak zortzi aste iraungo ditu, martxoaren 22tik maiatzaren 16ra bitarte, eta aste bakoitzean gai bat izango dute hizpide. Kanpainak herritarren interakzioa sustatzea du xede. Bide horretan, astero-astero zozketak egingo dira kanpainan zehar sare sozialetan aurkeztuko diren edukiak gertutik jarraituko dituztenen artean.

Kanpaina amaitu ondoren izango du jarraipena 'Arnasa Gara'-k, izan ere, UEMAko kide diren herrietan zortzi bideoak aurkeztu eta hausnarketa saioak ere egingo dituzte tailer formatuan. Era berean, UEMAko kide diren herrietako eskoletan lantzen duten hezkuntza proiektuaren baitan ere erabiliko dituzte aurrerantzean bideoak, soziolinguistika edukiak eta hizkuntza ekologia eskoletan lantzeko prestatuta dituzten unitate didaktikoetan.

'Arnasa gara' kanpaina abiarazi zuten duela bi urte Arabako Foru Aldundiak, Bizkaiko Foru Aldundiak, Gipuzkoako Foru Aldundiak, Eusko Jaurlaritzak, Euskarabideak, Euskararen Erakunde Publikoak eta UEMAk. Hainbat herritan egindako aurkezpen-ekitaldiez gain, 'Kartzela' websaila izan zen euskarri nagusia. Bi helburu eta fase izan zituen orduan kanpainak. Batetik, arnasguneetako biztanleek kontzientzia hartzea. Bestetik, gainerako euskal herritarrek ere arnasguneak babestea eta hedatzea euskararen normalizaziorako ezinbestekoa dela jakitea. Aurten ere ikus-entzunezko edukiak landu dituzte, sare sozialen bidez zabaltzeko. Hiru Damatxok ekoitzi ditu zortzi bideoak, eta Iametza arduratu da komunikazio kanpainaz. Orain arteko edukiak webgunean daude eskura.