Lau ikastola eta Kanboko Ikastolen Etxea bultzatzeko «elkartasuna»

Lau ikastola, Argia, Ibaialde, Argantzun eta Kattalin Elizalde eta Kanboko Ikastolen Etxearen artean banatuko dira 736.000 euro Gasteizko Armentia ikastolan mugimenduko 114 ikastoletako ordezkarien presentziarekin egindako EKEren Batzar Nagusian erabaki bezala. Batasunaren eta kohesioaren balioa azpimarratu dute batzarrean, bai eta elkartasuna eta lurraldetasuna ere.

Euskal Herriko 114 ikastolen elkartasun adierazpide den elkargunea, ikastolenak diren hainbat balioen praktika dela nabarmendu zuten, izan ere «halako ekimen baten atzean ez baitaude datu ekonomikoak soilik, elkartasuna, lurraldetasuna eta taldekotasunaren praktika ere bada ekimen hau».

736.000 euro banatu dituzte gaurko batzarrean, lau ikastolaren eta Kanboko Ikastolen Etxearen artean, euren proiektuak garatu ahal izateko bultzada izan dadin. Laguntza hau heldu den urterako da, eta kapital ekarpen gisa eman dira. Zehazki, honela banatu dute: Argia Ikastola (Tutera), 120.000 euro; Ibaialde Ikastola (Lodosa), 120.000 euro; Argantzon ikastola (Argantzon), 50.000 euro; Kattalin Elizalde kolegioa (Senpere), 300.000 euro eta lanen bigarren faseari ekinez gero beste 100.000 euro; eta Ikastolen Etxea (Kanbo): 46.271 euro.

«Erabaki hauei esker Euskal Herrian euskararen normalizazioaren bidean ezinbestekoak diren egitasmoak lagunduko ditugu», adierazi du Ikastolen Elkarteko lehendakari Nekane Artolak. «Taldeak norberaren errealitate eta egoeratik harago begiratzeko aukera ematen digu. Taldeak markatzen digu iparra, galduta gaudenean, ematen digu babesa garai zailetan, pozak partekatzeko ospakizunak antolatu eta erabakiak hartzeko sendotasuna ematen digu. Gure izatearen oinarri dela esan dezakegu, beraz».