Noemí Jiménez ikertzaileak 1,2 milioi dolarreko diru-laguntza prestigiotsua lortu du

Noemí Jiménez Rojo (Leioa, 1986) UPV/EHUko Ikerbasque ikertzaileak 1,2 milioi dolarreko zuzkidura duen Research Grant - Early Career beka lortu du, «mundu mailako ikerketa zientifikoko ospetsuenetakoa» unibertsitateko iturriek azaldu dutenez. «Lehia handiko deialdi batean ematen da, eta, beraz, nazioarteko aitorpen zabala ematen du», dio oharrak.

1989an Estrasburgon sortutako International Human Frontier Science Programek (HFSP) emana, « proiektu berritzaileak» ditu jomuga. Hala, 'MetaCrystal: Metabolic principles of intracellular crystallization'-ek zebra-arrainak bere pigmentazioan giltzarri diren kristal batzuk nola sortzen dituen argitzea du helburu.

«Lortzen dituzten emaitzak erabilgarriak izan daitezke kristalizazio anomaloa gertatzen den gaixotasunak tratatzeko terapiak garatu ahal izateko, hala nola giltzurrunetako kalkuluak eta hezueria, bai eta optikarako eta materialen zientziarako kristal organikok sintetizatzeko ere», azaldu dute.

«Ikerketa honen bidez, prozesu hori nola gertatzen den jakitea da gure asmoa, orain arte aztertu ez den funtsezko egitura bati erreparatuta: zelulen barruan kristal bakoitza inguratzen duen mintz lipidikoa. Iridosomaren mintza zer molekulak osatzen duten ulertu nahi dugu, eta zer neurritan lagundu dezaketen kristalak hain zehaztasun bikainarekin eratzen», kontatu du ikertzaileak.

Jiménezek gidatutako proposamena «ikertzaile gazteak» modalitateko 111 hautagairen artean (780 guztira) hautatu da, eta haren proiektua deialdi honetan ongien baloratutako bosten artean dago. Nazioarteko mailako 30 proiektuetan parte hartzen duten 103 ikertzaileetatik 3 baino ez dira espainiarrak.