Ekintza txikien bitartez aldaketa handiak gauzatzen

Gazteak bizitzeko prest gaude, baina bizitzarako prest? Asmo horrekin La Salle Beasainen, gure ikastetxean, errealitate ezberdinak ezagutzeko esperientziak abian jartzen dira urtero. Gertutik ezagutu, bizi eta egoeraren aurrean kokatzen lagunduko digutenak. Gure iritzi kritikoa izan eta solidarioa izateko lagungarriak dira bizipen hauek.

Gizartea eraldatzen protagonistak izan nahi dugu, gizarte hobeagoa lortzeko ahaleginak egiten. Horregatik, gaizki dagoenaz jabetzeaz gain, hobetzeko proposamenak egin nahi ditugu. Helburu horrekin solidaritatea bizitzeko aukera asko dago gure eskolan: ikasle boluntarioak, txikiagoak direnei ikasketetan laguntzen dietenak; aisialdiko begiraleak, eguneko zentroko gure aiton-amonekin egotera joaten direnak, janari bilketa kanpainetan laguntzea…

Baina, horiez gain, gure ikasketa prozesuan ere txertatuta dago mezu hau. Derrigorrezko Bigarren Hezkuntzan (DBH) ikasturtean zehar taldeka egiten dugun proiektu batek ere helburu hau dauka. Talde bakoitzak gizartean dagoen arazo bat identifikatu eta hobetzeko proposamena egin behar du. Horretarako, arazoa ikertu, alternatibak bilatu, hoberena aukeratu eta martxan jarri behar du, bizitu behar du.

Honen harira, iaz DBH 3. mailako ikasle talde batek aukeratu zuen proiektua COVID-ak ekarri zituen ondorioak gutxitzea izan zen. Horretarako, egoera aztertu zuen eta familia askoren maila ekonomikoak okerrera egin zuela ohartu zen. Irtenbidea bilatu nahian, bide ezberdinak arakatu ondoren, gure herrian lanean ari zen Caritasekin jarri zen harremanetan. Bertako arduraduna den Ainhoa Etxaberen laguntzaz, familiek zituzten beharrak identifikatu eta produktu bilketa bat antolatu zuten ikastetxean. Caritasen eskutik eta bidelagun gure herriko errealitatea gertutik ezagutu, erakunde batekin lanean aritu eta zenbait familiei laguntzeko aukera izan zuten. Gizakiok ezer espero gabe, ematen dugunean sentitzen dugun bizipoza ezagutzeko aukera izan zuten ikasle hauek.

Aurten, berriz, proiektu berri batean parte hartzen duen DBH 2. mailako beste talde batek arropa eta osagarrien kontsumoa murrizteko erronka planteatu zuen. Helburu horrekin, Justizia eta Bakearen astea-n, Caritasera joan ziren gai hau nola kudeatzen zuten ezagutzeko asmoz. Bertan, Ainhoarekin eta boluntarioa den Maria Angeles Cristobalekin goiza pasa zuten, eta egiten dituzten proiektu desberdinak ezagutzeko aukera eduki zuten.

Han azaldu zitzaien COVID-ak eta gaur egungo egoerak sortutakoak. Esaterako, azken urte honetan, argi indarra, gasa, elikagaiak eta erregaiak asko garestitu dira. Aldiz, langileen soldatak edota erretiratuen pentsioak berdin mantendu dira. Zenbait kasutan gainera, langileek lana galdu dute. Hau dela eta, hilabete amaierara justu iristen ziren familiak, egun, ugaritu egin dira eta oinarrizko produktuen gabezia pairatzen dute. Pentsatzen duguna baino askoz ere jende gehiago dago egoera horretan. Askotan gure estereotipotik kanpo dauden pertsonak dira.

Batzuetan, Caritasera hurbiltzeko lotsak eraginda joaten ez zirenez, bertakoak hurbildu dira pertsona hauen etxeetara. Azpimarratu nahi izen da pobreziaren muga ustez baino ahulagoa dela, eta momentu batean mugaren alde batean bazaude ere, inork ez dizula bermatzen beste aldera pasatuko ez zarenik. Horrelako egoeran daude zenbait beasaindar eta egon daitezke/gaitezke beste batzuk ere.

Hau guztia kontutan izanda, eta iazko esperientziak utzitako asebetetze maila ikusita, DBH 2. mailako talde honek aurrekoek hasitako lanari heldu eta jarraitzea pentsatu du. Horretarako, sentsibilizazio kanpaina egin eta produktu bilketa egitea erabaki du. Oraingoan, ordea, jaso nahi dituzten produktuak egoera berri honek sortutakoari aurre egiteko dira, hotzari eta eguneroko bizimoduari aurre egiteko produktuak: mantak eta lo zakuak, higiene produktuak (hortzetako pasta, gorputzerako gela, ilea garbitzeko xanpua, eskuetako xaboia, garbiketarako desinfektatzailea…) eta etxeko tresneria (kazuelak, platerak, edalontziak, tenedoreak, koilarak, zartagiak…).

Gaur egun sentsibilizazio kanpaina burututa dute jada. Beraiek egindako marrazkiekin bideo bat prestatu dute eta ikastetxean eta sare sozialetan zabalduko dute. Horrez gain, gai honen inguruko informazioa helarazi zaie familiei parte hartzera animatuz. Bide batez, erreportai hau ere proiektua aurrera eramateko bide izan daitekeela ikusten denez, eskuragarri jartzen dugu beharrezko informazioa.

Behar diren produktuak: mantak eta lo zakuak/ higiene produktuak/ etxeko tresneria

Bilketa datak: Martxoaren 28tik apirilaren 8ra

Jasotzeko tokia: Beasaingo La Salleko idazkaritzan

Bizitzarako prest egon nahi dugu. Mugaren beste aldea ezagutu, zaindu, eskua eman eta gure aldera ekartzeko ahalegintzen saiatu. Horregatik zuen laguntza eskatu nahi dugu. Ez gaude bakarrik, ez ditugu bakarrik utziko. Ekintza txiki askok aldaketa haundiak sor ditzakete. Anima zaitezte!

• Temas
• Euskera