Gabonetan ilusioa oparituz

Gabonak ilusioz beteriko jaiak dira askorentzat, etxeko goxotasunean familiarekin ospatzeko eta lagunekin egoteko momentu bikaina. Baina zoritxarrez, garai hau ez da hain zoriontsua familia guztientzat. Urrutira joan gabe, gure inguruan, Andoainen, ere badaude pandemiaren eraginagatik edo arazo ekonomikoengatik gaizki pasatzen ari diren familiak eta, ziurrenik, gabonak ospatzeko aukerarik ere edukiko ez dutenak.

Familia horietan pentsatzen hastean, bereziki haurrak datozkigu burura La Salle Berrozpe 4. DBHko ikasleei. Nola ahaztu txikitan opariak irekitzeko momentu zoragarri hori? Ez al genuke denok eskubide hori izan beharko? La Salle Berrozpen familia horiei laguntzeko prest gaude eta etxeko txikienak oparirik gabe gera ez daitezen, urtero bezala, jostailu bilketa bat antolatu dugu, eta Gure Eskolarako erreportaje honetan azalduko dugu. Ekintza honen bidez, gure ikastetxeko kide guztiok aktibo izango gara eta helburu berdina duen proiektu solidario berean parte hartuko dugu.

La Salle Berrozpekoen artean lortuko ditugu jostailuak eta, ondoren, Emauseko Traperoak Elkarteko kideen bitartez, Andoain eta inguruko familia behartsuenei iritsiko zaizkie. Jostailu bilketan ikastetxeko kide guztiok hartuko dugu parte. Haur Hezkuntzako txikienen kasuan, ume bakoitzak jostailu baten marrazkia egingo du ikasgelan eta marrazki hori etxera eramango dute gurasoek ume behartsuentzako jostailuak eskolara eraman ditzaten. Lehen Hezkuntzaren kasuan, berriz, bertako ikasleen familia batzuk, beste familien eta seme-alaben parte-hartzea bultzatuko dute.

Ekartzen dituzten jostailuak ahalik eta egoera onenean egotea gomendatuko da. Azkenik, DBHko ikasleok, adin honetatik aurrerako ikasleen jostailu bilketako arduradunak bilakatuko gara, ikaskideok jada erabiltzen ez ditugun txikitako jostailuak ikastetxera ekartzera animatuz.

Aipatu dugun jostailu bilketaz gain, ideia berritzaileagoak ere sortu dira gure ikastetxean; esaterako, Administrazioa eta Finantzak zikloko bigarren mailako gazteek egingo duten ekimen solidarioa. Administrazio eta Finantzetako ikasle hauek Ikasempresa izeneko ikasgaian, enpresa batek nola funtzionatzen duen ikasten dute. Hala, departamendu ezberdinetan antolatzen dira, eta lan egitea tokatzen zaien departamentuaren arabera, lan desberdinak egiten dituzte.

. Proiektu hau egiteko Andoaingo Udalarekin harremanetan jarri dira, behar ekonomikoak dituzten familien kontaktuak lortzeko eta haur horiek Olentzerori eskatu nahi dizkioten oparien zerrenda jakiteko.

Behin zerrenda edukita, ikasle hauek jostailuak erosteko dirua lortzeko erronkari aurre egin beharko diote, jendearen donazioen bidez. Horretarako, web-orri bat sortu dute eta, bertan, transferentzien bidez donazioak egin daitezke. Interneta hainbeste erabiltzen ez duen jendearentzat, beste hainbat dinamika sortu dituzte, adin guztietako jendeak dohaintza egiteko aukera izan dezan. Adibidez, Andoaingo Zahar Egoitzan bingoa antolatu dute, tabernetan euroak uzteko botetxo bat jartzea pentsatu dute, eskualdeko enpresa desberdinekin hitz egingo dute…

Ikasle hauek haur hauek zoriontsu egiteko eta Gabon zoriontsuak igarotzeko edozer egiteko prest daude, eta hortik dator beraien webgunearen izena: 'Poztailu'. Poztailu hitzak hainbat esanahi desberdin ditu: Lehenengoa eta konturatzeko errazena, poza eta jostailu hitzak dira. Baina hitz honek hori baino askoz gehiago esan nahi du: umeei poza sortzeko tresna bat izan nahi du; poza sortzeko txanpon bat jartzea nahikoa izango delako aurtengo Gabonetan.

Web-orrialdean proiektu honen helburua azaltzeaz gain, bereziki ume bakoitzak zein jostailu eskatu duen eta zenbat diru balio duen azaltzen da, nahi duen orok dirua dona dezan. Proiektu honen partaide izan nahi baduzu, honako link honetan egin dezakezu: https://poztailu.wixsite.com/poztailu. Web-orrialdean aipatzen den bezala, zure laguntzak irribarreak sorraraziko ditu.

• Temas
• Guipúzcoa