Asmo onez beteriko ikastetxea

L.H. 6.A gelako ikasleak gara eta ikasturte honetan giza-eskubideen inguruko proiektua egin dugu, 'Zorioneko eskubideak' proiektua. Gure Eskolako kanal berrian aurkeztuko dugu zuentzat.

Egin dugun lehenengo gauza pertsonek dituzten ezaugarri onak izendatzea izan da. Gerora, egoera desberdinen aurrean nola sentitzen garen neurtzeko ariketa egin dugu, oso deseroso oso eroso tartean. Adibide bezala, honako hau: autobusaren zain nagoenean, beloa daraman emakume bat nire ondoan esertzean nola sentitzen naiz?

Bestalde, lagunak, maitasuna, familia, besarkadak, alaitasuna… ezin direla diruarekin erosi ikasi dugu. Eskubide desberdinak ulertu ahal izateko, mota askotako ariketak egin ditugu: adierazpen askatasun eskubidea eta biltzeko eskubidea, 19 eta 20. eskubideak, besteak beste. Ulertu ahal izateko, gelako ikasle desberdinek aulkietara igo eta jendearen aurrean ozenki hitz egin dute. Ikaskideak aulkiaren inguruan interesaren arabera hurbiltzen ziren.

Gelakideak bikoteka banatu gara eta Nazio Batuei gutuna idatzi diegu, eskubide bakoitza aldarrikatzeko eta herrialde bakoitzeko egoera aldatzeko eskatuz. Banakako eta talde mailako konpromisoak hartu ditugu eta ikasturte bukaeran bete ditugun ala ez ikusiko dugu. Berdintasunaren eskubidea ulertzeko, rap bat sortu dugu, neskak eta mutilak berdinak garela aldarrikatzeko. Eskolan egin dugun proiektua ulertzeko eskubide bakoitzeko fitxa bat sortu dugu, patioan eskegi duguna. Fitxa horietan eskubide bakoitza azaldu dugu eta QR batekin informazioa gehitu.

Zorioneko eskubideak lurralde guztietan disfrutatu beharko dituztela pentsatzen dugu, izan ere, eskubideak oso garrantzitsuak direlako mundua hankaz gora ez egoteko.

• Temas
• Educación