Bigarren urtez Gau Beltza antolatu du Orereta Ikastolak

Bigarren aldiz Gau Beltza antolatu du Orereta Ikastolak urriaren 31ko ilunabarrean, herriko hainbat eragilek lagunduta, hala nola, Lau Haizetara Elkartea, Amulleta tanbor-kofradia, Xenpelar AEK euskaltegia, Ereintza dantza-taldea, Urdaburu Mendizale Elkartea, Aisiolako begiraleak, etab. Kalabazaren Bidea da proposamena; arratsaldeko 19.30ean Santa Klaratik abiatu eta herriko hainbat kaletatik pasatu ostean, ordubete ingururen buruan, Gamon Zumardian amaituko den sorpresaz betetako bidea.

Kalabazaren gurdiarekin, trikimako gaineko orekariekin, dantzan zein musikaz eta kriseilu nahiz lastargien argipean, mozorrotuta, egingo da uzta garaia agurtu eta neguan sartzeko Kalabazaren Bidea.

Gamon Zumardiko emanaldian, herriko hainbat eragilek euren emanaldia egingo dute. Hori amaituta, beldurren eltzean izuak erreko dira eta suzko zezenarekin emango zaio bukaera festari, 20.30ak aldera. Orereta Ikastolak herritarrak bidean bertan parte hartzera animatu nahi ditu, ahal izatera mozorrotuta. Izan ere, «Gau Beltzak herritik herriarentzat sortutako festa izan nahi du eta hala desio duen herritar oro dago bertan parte hartzera gonbidatuta».

Gau Beltzaren Kalabazaren Bidearekin batera, duela bi urte, Orereta Ikastolak (mikro)ipun eta ikus-entzunezkoen lehiaketa jarri zuen abian DBH1etik gorako gazteentzat. Aurten ere halaxe egin du: urriaren 31tik abenduaren 3 arte izango da hirugarren edizio honetan parte hartzeko aukera.

Ikastolako langile-talde batek hala proposatuta, Ikastolaren izaera eta baloreekin bat egiten duela sinetsita, herrian Gau Beltza antolatzea erabaki zuen Ikastolak duela bi urte. Jakina da herrian egun honen inguruko bizipenak eta usadioak aldatu egin direla azken urteetan: hemengoak zirenak itzali eta atzerritik eraldatuta etorritako jaiek hartu dute haien lekukoa.

Izan ere, herrian Gau Beltza ospatzen zenaren testigantzak egon badaude. Besteak beste, Erdiko Kaleko haurrak Gaztaño auzoko baratzeetara joaten omen ziren kalabaza bila, hustu eta kalean bertan zein hilerri zaharrean jartzeko. Baratze batzuk besteak baino nahiago omen zituzten, bertako kalabazak errazago husten ei zirelako. Hamarkada ba-tzuetan usadioa eta kalabazak itzalita egon badira ere, orain urte batzuk Erdiko Kaleko familia ba-tzuk hasi ziren berriz ere Gau Beltza ospatzen.

Hortaz, hemengoak diren kontakizunetatik abiatuta, esan bezala, herrikoek Gau Beltza ospa-tzen zutenaren testigantzak egon bai baitaude, «jai hau birsortzea da helburua; eta honen guztiaren ardatz herria, komunitatea, aniztasuna, berdintasuna, izaera eta euskara dira». Bereziki eskertu nahi ditu Ikastolak Gau Beltza antolatzera ilusio eta gogoz batu zaizkion herriko eragile laguntzaile guztiak; festara batu izanagatik beragatik zein hari egindako ekarpenengatik. Izan ere, ezinbestekotzat dute horiek guztiak ere honen denaren parte izatea, egitasmoaren beraren izaera eta helburuengatik.

Horiek esanda, herritar oro gonbidatu nahi du Ikastolak Gau Beltzean parte hartzera, Gau Beltzak herritik sortu eta herriarentzako zein herritarrentzako festa izan nahi baitu.