Errenteria
'Imanol lau haizetara' ikuskizuna, igande honetan Lekuona Fabrikan

Landarbaso eta Kontari abesbatzek abeslariaren errepertorioan oinarritutako kontzertua emango dute

Iker Castaño

Errenteria

Sábado, 25 de mayo 2024, 20:12 | Actualizado 20:28h.

Ikuskizun handia prestatu dute igande honetarako Landarbaso eta Kontari abesbatzek. 'Imanol lau haizetara' izenburupeko kontzertua emango dute Lekuona Fabrikan, 20:00etan hasita. Imanol Lartzabal abeslariaren kantutegian oinarritutako saioa izango da, hainbat gonbidaturekin. Gainera, EITBk emanaldiaren grabazioa egingo du, aurrerago emititzeko. Sarrerek 10 euroko prezioa dute, eta Errenteriako Udalaren sarrera salmenta zerbitzuaren bidez, nahiz Lekuonan bertan eros daitezke.

Hainbat protagonista

Landarbasoren zuzendari Iñaki Tolaretxipi izanen da, eta Kontariko gaztetxoen gidari Maddalen Dorronsoro; azken abesbatza horren bakarlari bezala Anne Barron ariko da. Imanolen abestien moldaketak Joxan Goikoetxeak egin ditu. Oholtzan, ordea, ez dira bakarrik izango herriko bi abesbatzetako kideak. Izan ere, Leire Martinezek ere ekarpena egingo dio ikuskizunari, eta musikari entzutetsuak ere hartuko ditu Lekuonak, tartean direlarik Joxan Goikoetxea bera, Txema Garces, Iosune Marin eta Roberto Pacheco.