Oiartzun

Altzibar auzoak ostegunean emango die hasiera jaiei

Dena prest du Altzibarko Festa Batzordean auzoko zita nagusirako. Ekaineko azken egunetarako egitarau oparoa antolatzen dute, eta aurten ere ez dute hutsik egin. Joan den larunbatean eta igandean hasi zituzten beroketa lanak, truk txapelketa eta San Joan suarekin.

Ostegunean piztuko dute festei hasiera ofiziala emateko traka, eta igandera bitarte ez dute atsedenik hartzeko tarterik izango, dozenaka ekintza prestatu baitituzte. Auzoan hain errotuta dauden tortilla jatea eta danborradaz gain, berrikuntzak ere gehitu dituzte aurtengo egitarauan.

Larunbat goizean munduko dantzen erakustaldia egingo dute Abarka Elkartearekin elkarlanean eta gauean marea arrosarekin koloreztatuko dute auzoa.

Igande eguerdian paella jatea egingo dute estreinakoz eta aurretik bermujazz, musikaz girotutako poteoa eta bermut dastaketa.