Botikei esker

Gogoan dut duela urte batzuk Jaurlaritzako sailburu batek (izenak ez du hemen axola) kontatu zidana. Ba omen zebilen zoro moduan batetik bestera, zuloak bete nahian, suak piztu edo itzaltzeko ahaleginetan eta, halako batean, pentsatu omen zuen agenda arindu behar zuela. Eseri omen zen, agenda aurrean zuela eta eginkizunak banan bana aztertu ondoren, erabaki zuen ezin zuela ezer ezabatu, premiazkoak zirela apuntatutako zeregin guztiak.

Biharamunean auto istripu baten ondorioz, ospitalean esnatu omen zen eta handik aurrera agendak ez zuen batere axola eta zerua gainean erori bazen ere, horrek ez zuen eraginik ospitalean. Hori bai, kontatu zidan sendatu ondorengo lehen egunetan hitzorduekin kontuz ibili bazen ere, handik gutxira agenda istripuaren aurretik bezain betea zuela.

Nork, zerk lagunduko dizu larrialdi baten aurrean zaudenean, zu eta gaixorik dagoena? Erantzuna argia da: zientziak lagunduko dizu, medikuntzak eta gainerako zientzialari askok sendagintzari egindako ekarpenek lagunduko dizute.

Irudika dezakegu gaur eskura ditugun botikarik gabeko mundua? Eta oraindik sendabelarren menpe bageunde, oraindik kimika Erdi Aroan bezala balego, edo, okerrago, anestesiarik ez bagenu?

Egin daitezke eta egiten dira aberastasun izugarriak botikekin, batzuetan botika horien ondorio gaiztoak ezkutatuz. Egin daitezke eta egiten dira gehiegikeriak botikekin, beste modu batera senda daitekeenik aintzat hartu gabe. Baina onartu behar dugu gure bizitza hobea dela, gizatiarragoa zientzialariei esker.

Galdetu bestela oinazez dagoenari zer gertatzen zaion botika batek oinaze hori kentzen dionean.