Lanaldiaren murrizketa

Gauza harrigarrietan harrigarriena patronalak asteroko lanaldiaren murrizketaren kontra daudela jakitea izan da. Aho batez, gainera. Egia esan, ez nau harritu erabakiak, harritu nauena disimulurik eza izan da. Historiak irakatsi digu lanorduen murrizketaren aldeko erabakiak beti izan direla gatazkatsuak, beti atera direla borroka baten ondorioz. Baina, inozoa ni, pentsatzen nuen hogeita batgarren mendea aurreratua dagoen honetan, murrizketaren kontrako jarrera itzulingurutan bildua etorriko zela, hitz ederrez josia.

Ez ba. Ezetz eta ezetz eta eskerrak ez direla lanorduak gehitu egin behar liratekeela esatera ausartu, oraingoz, jakina baita langileok beti garela alperrak eta nagusiak, berriz lan zale amorratuak. Errealitateak frogatutako zerbait da langile askoren lanaldiak gainditu egiten duela legeak dioena, hori bai, ezkutuan, ordu osagarriak dirutan islatu gabe.

Hortik kanpo langile askok ordutegi murriztuagoa du, esparru publikoan nahiz pribatuan. Abantailatsuak dira, askok nahi lituzkeen lan baldintzak dituzte. Egia da, era berean, lanaren eskaileran gora egin nahi duenak sarritan gainditu behar izaten duela legez dagokion ordutegia. Arduradun askorentzat, azpitik dituenen lan orduak ez baitira sekula aski, ez zenbakitan ez emankortasunean. Muturreko adibide bat: munduko gizonik aberatsenak, Elon Musk du izena, orain Trumpen gobernuaren parte, kargua hartu eta hurrengo egunak bulegoan egin omen zuen lo, lurrean. Aipa iezaiozu lan orduen murrizketa.

Langile gehienok onartuko dugu norabidea murrizketa dela. Abiadura eztabaida daiteke, ez norabidea. Langile gehienek pentsatuko dute lau hamarralditan lanaldiaren murrizketa mantsoegi doala, berrogei urtetan ordu pare bat besterik ez dela laburtu lanaldiaren iraupena.

Esan ziguten mende hau aisialdiaren mendea izango zela, gero eta lan ordu gutxiago, gero eta aisialdi gehiago. Pauso batzuk eman dira baina aisialdiaren gizartea ez da jaio. Auskalo zer gertatuko den oraindik indarrean ez dagoen legearekin, baina zerumuga laino beltzez josia dago.