Zorioneko bizitza

Hainbestetan emaitza gaitzetsiak eman dituen CIS-ek zorionaz galdetu dio hainbati, milaka lagunei, Espainia osoan. Inkestaren arabera, ehuneko laurogeita hamarri iruditzen zaio horixe dela bizitzaren helburu nagusia, zoriona, ez zerura heltzeak dakarrena, lurreko zoriona baizik. Eta ehuneko laurogeiak erantzun du zoriontsu dela daraman bizitzarekin. Zenbat zorion bazterretan.

Hori bai, zorionaren langa asko igotzen omen da adinarekin eta behin berrogeita hamalau urte bete ezkero, gutxiago omen dira zoriontsu direla azaltzen dutenak. Beste xehetasun bat: zoriontsuago da ezkerreko jendea eskuinekoa baino. Irakurri dudan txostenaren laburpenak dioenez, zuzenean, Euskal Herria Bilduri botoa ematen dioten guztiek dute beraien burua zoriontsutzat.

Familia aipatzen omen du askok zorion iturri gisa, dirua, osasuna. Familiari dagokionez, zalantzarik ez askorentzat ingurukoak zorion iturri direla. Nonbait, ez dute telefonoan harrapatu familia infernutik hurbil dagoen zerbait dela pentsatzen duenik. Dirua, berriz, ez omen da baldintza nagusia, egia omen da diruak ezin duela zoriona erosi. Hori bai, penak handiagoak dira diru faltarekin batera badatoz. Osasunari dagokionez, guztiok ezagutu ditugu osasun kaskarraz zoriontsu bizi direnak eta osasun betean zorigaiztoko direnak.

Beste zerbait ere adierazten omen dute CIS-arengandik galdera jaso dutenek, alegia, beraien zoriona eta ingurukoena lotuak daudela, ez omen zaie aski norberaren zoriona, baldin eta zorigaiztoz inguratuak badaude. Auskalo zer den zuretzat, irakurle, zoriona, sabeleko korapilorik eza, poza, alaitasuna, olatu txikiko itsasoa.

Baina zer nahi den, jakin ezazu, irakurle, zutabe honetako azken lerroetara heldu zarela jakingo banu, horrek zorion tanta bat gehituko liokeela nire zorionari.