Ez dugu ikusten

Nire amak harriduraz ikusi du Txinaren eboluzioa: txinatarrentzat dirulaguntza eskatzetik, bere pobrezia handiagatik, nola iritsi den superpotentzia izatera. Deng Xiaopingek 1978an agintea lortu zuenetik, gauzak zeharo aldatu dira herrialde horretan. Aldaketa handiak ikusiko ditugu, hain zuzen, datozen hamarkadetan zenbait herrialdetan eta nazioarte mailan.

Errusia eta ... Txina etsaituak egon ziren, nahiz eta bietan alderdi komunistak agintzen zuen. Gerra hotzaren garaian, Nixon eta Kissingerrek Txinarekin harremanak gauzatu zituzten, nire etsaiaren etsaia nire laguna da ideiari jarraituz. Harreman horri, eta 2001ean Munduko Merkataritza Erakundean sartzeari, etekin handiak atera dizkio Txinak. Gainera, Errusia eta Txina adiskidetu egin ziren duela 75 urte beren arteko harremanak berrezarriz. Urteurren hori ospatzeko Pekinen izan zen Putin joan den astean. Inoiz baino hobea da potentzia bien arteko harremana, eta Xi Jinping eta Putinek hitz handiak erabili zituzten bien arteko aliantza estrategikoa berresteko. Presidente txinatarra Europatik itzuli berria zen, non EBrekin dituen gorabeherak eta hartu-eman zailak egiaztatu baitzituen, baina, aldi berean, Serbia eta Hungariarekin (biak Errusiarekin harreman onekin) duen lotura sendotu zuen.