Kontentzioa

Netanyahu israeldar lehen ministroak bere helburuak lortu ditu, berriro ere. Nazioarteko Auzitegi Penalak epaitu beharko luke Gazan egiten ari den masakreagatik, baina nago hori ez dela gertatuko. Aitzitik, fokua Iranen jarri du orain, herrialde honek Libanoko Hezbollah-ri, Gazako Hamas-i, Yemeneko huthiei eta Siriako erregimenari ematen dion laguntzagatik. Badaki Iranen aurkako erasoetan AEBko errepublikanoen eta herrialde arabiar askoren sinpatia erdietsiko duela. Izan ere Jordaniak Israelen kontrako zenbait dron iraniar eraitsi zituen. Halaber, israeldar gobernuak harreman onak ditu Marokoko agintariekin, eta Egipto eta Saudi Arabiak ez dute erabaki gogorrik hartu Israelen hilketak geratze aldera. Netanyahuren gobernuak Gazako sarraskiarekin eta Zisjordaniako leku gehiago kolonizatzen jarraituko du; AEB haiek gaitzesten dituen ebazpenak NBEn betatzen jarraituko du; eta Alemania, Frantzia eta Erresuma Batuko buruzagiek israeldar gobernuaren jarduera ez kritikatzen jarraituko dute.

Israeleko gobernua eta Iraneko aiatolen erregimen errepresorea gaitzesgarriak iruditzen zaizkit biak, eta Ekialde Hurbil-Ertainean biak egiten ari diren politikak arbuiagarriak dira, nire iritziz. Israeldar gobernuaren ekintza kriminalek ez dute oposizio sendorik herrialde hartan. Kalean bai egiten dira manifestazioak: Hamasek joan den urriaren 7ko eraso terroristan bahitu zituenen senideek, eta ehundaka mila herritarrek gerra geratzea eskatzen dute aldiro. Baina parlamentuan ez dago ia aurkako jarrerarik. Oposizioko buru nagusia zen Benny Gantz Netanyahuk sortu zuen gerra-kabineteko kide da.

Ba al dago nazioarte mailan erregio hartan bakea eta justizia errotzeko xedez ekimen eragonkorrik har dezakeen agente edo erakunderik? Zoritxarrez, ezetz erantzun behar da, ahalmen edo borondate faltagatik.