Terrorismo zer da?

Errusiak ekintza armatu oso bortitzak egin ditu populazioaren gehiengoa musulmana den zenbait herrialdetan, hala nola Txetxenian edo Sirian, edo bere interesak Afrikako Sahel erregioan defenditzeko ISISen aurka jardun du. Ekintza horietan oinarrituko du seguruenik talde horrek bere atentatu basatia. Argi eduki beharko genuke ezein indarkeriak giza eskubide oinarrizkoenak urratzen dituela eta, hartaz, gaitzesgarria dela. Eta, bestetik, azpimarratzekoa da kristauen aurkako gerra bat bultzatu nahi duela ISISek, errusiar ortodoxoen aurka, baina baita estatubatuar ebanjelikoen edo europar katoliko zein protestanteen kontra.

Estatu batzuek ere praktikatzen dute terrorismoa. Israel Gazan egiten ari dena, adibidez, horrela kalifikatu behar da, edo EABk edo Errusiak hainbat kasutan egin dutena ere bai. Terrorismo batek ezin du, dena den, inoiz beste bat justifikatu; denak dira arbuiagarriak. ETArena gaitzesgarria zen, eta GALena ere bai. Hori argi ez duenak arazo larri bat du giza eskubideak ulertzeko edo defenditzeko. Ekintza terroristei aurre egiteko orduan, dena dela, gorrotoa eta gizatalde oso baten aurkako jarrerak ekidin behar dira; hala nola, islamofobia edo antisemitismoa.

Halaber, terrorismoaren definizio juridiko edo politikoak ondo neurtu eta mugatu beharko lirateke. Puigdemontekin gertatzen ari dena, adibidez, esperpentikoa da. Errusian ni terrorista izan ninteke gay aktibismoa egingo banu. Hango Auzitegi Gorenak eta Gobernuak kategoria horretan sartu dituzte hango LGTBI taldeak. Eliza ortodoxoaren doktrina ultrakontserbadorearen eragina gero eta handiagoa da Errusian, agintari politiko eta epaileengan. Ikaragarria da noraino iritsi daitekeen homofobia.