GETARIA / Getariako haurrek 'Egin Kantu!' telebista-saioaren grabaketarekin gozatu ahal izan zuten

GETARIA. DV. Asko izan ziren atzo arratsaldean Getariako Sahatsaga Kiroldegiaren kanpokaldean kokatutako karpan ETB1eko Egin Kantu! saioaren grabaketara gerturatu ziren lagunak, bai getariarrak eta baita inguruko herritakoak.

Parte-hartzaileek, tartean 19 getariar, eguerdiko 14:00etan hasi zituzten grabaketarako azken entseguak. Urduritasun eta prestaketa askoren ostean, azkenean arratsaldeko 17:00etan ekin zioten grabaketari.

Ikusleen artean, herriko jende asko. Iturzaeta Herri Eskolako ikasle asko jada arratsaldeko 16:00etan eskolatik irten eta zuzenean kiroldegira gerturatu ziren ikuskizunerako tokia hartzera. Eszenatokian ziren getariarrak animatzeko kartelak ere ez ziren faltatu.

Guztira bost egunetako saioak grabatu zituzten atzo arratsalde osoa iraun zuen grabaketa saioan, datorren astean, astelehenetik ostiralera, emitituko direnak, apirilaren 23tik 27ra bitartean.