Aste Nagusiko DJ gazteen I. erakustaldiko partaideak aurkeztu dira

Donostiako Aste Nagusiko DJ Gazteen lehenengo erakustaldian parte hartuko duten Dj-ak aurkeztu dira gaur Udaletxean. Alfonso Gurpegui Festa Jardueretako Zinegotziak, Imanol Telleria Udaletxeko Hezkuntzaren eta Gizarte Sustapen saileko zerbitzu buruak eta Justo Albarrán Donostiako FNAC-eko zuzendariak eman dituzte aditzera Donostiako festetago gauei musika jarriko dietenen Dj-ak.

DJ donostiar gazteen musika-produkzioa ezagutzera ematen laguntzeko helburuarekin hautatutakoak 25 urtetik beherakoak dira eta Aste Nagusian zehar, Kursaaleko terrazetan egingo dituzte saioak, 13an hasi eta 20an amaituko direlarik. Honakoa da saioen egutegia, hurrenez urren: Igor Sanchez "The Strangers", Telmo Rivilla "Biggo", Rebeka Urdanpilleta "Bekyshow", Ander Melchor "Wilco", Jorge Barbadillo "George B", Iñigo Plazaola, Iñigo Nicolas "Nico Ross" eta, Ruben Medina "Medd Ryles" azkenik.