Indarrak batu eta taldean aritzeko topaketa

Ikasturtean zehar eskolaren eremuan hizkuntzaren erabilera sustatzeko eta euskararekiko sentiberatasuna sustatzeko hainbat ekintza egin ostean, euskara sustatu eta erabilera indartzeko asmoa duten 14-17 urteko ia 100 gaztea bildu dira ostiral honetan Tabakaleran. Antolatzaileen asmoa elkar ezagutzea eta ekimen bateratuak antolatzea posible egitea izan da.

Euskara batzordeak aisialdiarekin eta gozamenarekin loturiko ekintzak egin dituzte ikasturtean zehar ikaskideak erakartzeko asmoz, besteak beste, kutxa jokoak, ihes jokoak, euskal musikarekin loturiko zerrendak eta lehiaketak. Ostiral honetan Aldapeta Maria, Altza BHI, Antigua-Luberri BHI, Arantzazuko Ama BHI, La Asunción, Lauaizeta BHI, San Luis-La Salle, Usandizaga BHI, Zubiri-Manteo BHI eta Zurriola ikastolako kideak batu dira.

Abenduan egindako topaketari jarraipena eman dio eta gazteentzat erreferente diren zazpi gonbidatuk ere parte hartu dute: Sara Zozaya musikaria, Ainhoa Nebukai youtuber-streamerra, Maddi Ane Txoperena idazlea, Kai Nakai musikaria, Andoni Rekondo bertsolaria, Aitor Majada tiktoker eta musikaria, Peio Armendariz musikaria, Aiora Enparantza aktorea eta Iker Sanz dantzaria.

Zazpi protagonistak gazteekin solasean aritu dira taldeka antolaturiko mahai inguruetan, eta ondoren gazteek sorturiko ihes jokoan parte hartu dute beraiekin. Topaketa bukatzeko, musikak hartu du protagonismoa DJ Makalaren eskutik.