Arlo jakin batzuetan kontzentratzen da emakumeek I+Gn duten presentzia

Zientziaren munduan emakumeak duen ordezkaritza ikusarazteko ostegun honetan ospatzen Emakume eta Neska Zientzialarien Nazioarteko Egunean, Eustatek emakumeek Euskadin zientzian duten parte-hartzea aztertu du. Horretarako kontuan izan du I+G jardueretan eta bigarren eta unibertsitateko irakaskuntzan emakumeek duten ordezkaritzaren.

Eta bildu dituen datuen arabera (2019koak dira), Euskal AEn I+Gn ibiltzen diren 32.232 pertsonetatik 12.162 emakumeak dira; hau da, %38. I+Gn lan egiten duten pertsona guztien artean, Administrazio Publikoan emakumeak % 60 dira; ondoren, Irakaskuntzaren sektorean ia ez dago alderik gizonen eta emakumeen artean (% 49,9 dira emakumeak), eta, azkenik, Enpresen sektorean % 29,5 baino ez dira emakumeak.

Diziplina zientifikoaren arabera, Ingeniaritza da I+Gn lan egiten duten pertsonen kopuru handiena duen jarduera (20.614 pertsona, guztizkoaren % 64), eta emakumeentzat ere jarduera nagusia da, zeren I+Gn lan egiten duten emakumeen % 48,5ek diziplina horretan lan egiten baitute, baina gizonen proportzioa (% 73,3) baino askoz txikiagoa da. Hala ere, I+Gn aritzen diren emakume guztien artean, % 22,8 Medikuntza Zientzietan aritzen dira (% 9,3 gizonen artean), eta % 15 Gizarte Zientzietan (I+Gn ari direnen gizonen artean, % 7,8).

Emakumeek I+Gn duten ordezkaritzaren bilakaerari dagokionez, azken urteotan nabarmen egin du gora. Horrela, 1993an % 22,3 ziren, 2003an % 31,3 eta, pixkanaka, hazten joan da gaur egun % 37,7ra iritsi arte. I+Gn dauden emakumeen kopurua 1993ko 1.928tik 2019ko 12.162ra igo da.

Ingeniaritza izan da joera-aldaketa hori gehien bultzatu duen diziplina zientifikoa, eta bikoiztu egin du emakumeen ehunekoa I+Gn, % 14,1etik % 28,6ra. Unibertsitateari begiratzen badiogu, % 56 emakume ikasleak dira. Hala ere, gradu zientifiko bat ikasten duten emakumeen artean, gehienek alde handiz (% 75,49k) Osasun eta gizarte zerbitzuetako graduetan ikasten dute, % 28,94k Mekanika, Elektronika eta bestelako prestakuntza teknikoa; Industria eta Eraikuntza delakoarekin lotutako graduetan eta % 16,76k Informazioaren eta Komunikazioen Teknologietan. Natur Zientzietako, Kimikako, Fisikako eta Matematikako graduetan emakumeak ikasleen % 49,70 dira.

Batxilergoan proportzio bera dago mutilen eta nesken artean, baina emakume gehiago dago aukera guztietan, Zientzietan izan ezik (% 48). Nabarmentzekoa da Arte eta Giza Zientzietan neskek duten matrikula-kopuru handia (% 70) eta, ondoren, Gizarte Zientzietan (% 60).

Azkenik, Lanbide Heziketan neskak % 33 dira, eta, bereziki, adar hauek aukeratzen dituzte: Irudi pertsonala (non neskak % 90 diren), Ehungintza, jantzigintza eta larrugintza eta Zerbitzu soziokulturalak eta komunitatearentzakoak (% 80 dira kasu bietan), Osasuna (% 75 dira), Administrazioa eta kudeaketa (% 60 dira) eta Elikagaien industriak eta Kimika (% 60 dira bietan). Eskainitako gainerako familietan gizonezkoak dira nagusi, Merkataritza eta Marketinean izan ezik, non parekotasuna baitago.