CIC energiGUNEk etorkizuneko bateriak diseinatzeko ikerketa bultzatzaileak elkartuko ditu

CIC energiGUNEk baterien iraultzaren buru izango den Europako ekosistemaren goi bilera antolatuko du irailaren 12an, Gasteizen. Energiaren biltegiratze elektrokimikoaren eta termikoaren alorrean Europa mailako erreferentziazko ikerketa zentroak etorkizuneko bateriak diseinatzeko epe laburreko zein luzeko ikerketa bultzatzen ari diren Europako ekimenen ordezkari nagusiak elkartuko ditu.

Topaketan azpimarratzekoa izango da Kristina Edström BATTERY 2030+ren koordinatzaile eta 2030erako arlo horretako ikerketan Europa buruan jartzeko Europar Batasunaren apustuaren ardatz den programaren arduradun nagusiaren presentzia. Bestalde, CIC energiGUNEk jakinarazi du Nuria Gisbert CIC energiguneko zuzendari nagusiak eta Pilar Garcia de Salazar Arabako Foru Aldundiko Garapen Ekonomikorako eta Lurralde Orekako diputatuak inauguratuko dutela topaketa.

Ondoren, Edel Sheridan Batteries Europe Teknologia eta Berrikuntzako Europako Plataformako kidea eta Diego Pavia KIC InnoEnergy-ko CEO eta European Battery Alliance-ko ordezkariek parte hartuko dute, eta merkatuen sarbideari eta kontinentean identifikatutako joerei buruzko ikuspegia eskainiko dute. Halaber, Alvaro Martin-Aceña Espainiako Industria, Merkataritza eta Turismo Ministerioko Mugikortasun Alternatiboko Arloko buruak eta Juliana Restrepo AEPIBAL enpresaren zuzendari nagusi eta BatteryPlat Espainiako plataformaren zuzendari nagusiak esparru horretan egiten ari den lanaren egoera hurbilduko dute.

Jardunaldia amaitzeko, Arantxa Tapia Eusko Jaurlaritzako Ekonomiaren Garapen eta Azpiegitura sailburuak Euskadin bateriek duten balio katearen egoera azalduko du, laborategian egiten den ikerketa lanetik espezializazio adimentsu estrategiara. Horrela, sailburuaren hitzaldiak energia biltegiratzearen euskal industriaren indarra azpimarratuko du, CIC energiGUNE parte den Basque Research and Technology Alliance (BRTA)partzuergo zientifiko teknologikoan elkartuta dauden eragile guztiena, batez ere.

Irailaren 12an 09:00etatik 13:00etara egingo den jardunaldian izena emateko epea irekita dago jadanik. Ekitaldira joan nahi duten profesionalek ekitaldiaren webgunean eman ahal izango dute izena: batteriessummit2019.cicenergigune.com. Sarrera dohainik izango da.