Gela itxien kopuruak egonkortzera egin du 250 ikasgelekin

Covid-19aren pandemiak ikastetxeetan duen eraginak egonkortzera egin du. Hezkuntza Sailak iragarri duenez, 250 gela itxita daude koronabirus kasuengatik, ostiralean baino 3 gutxiago, 140 ikastetxetan.

Gaur aurrez aurreko eskola-jarduera etenda duten ikastetxe bat dago: Gasteizko Nuestra Señora del Carmen HHI-.

Aurtengo ikasturtean Euskal Hezkuntza Sistemak 17.554 ikasgela ditu guztira (2 urtetik unibertsitatez kanpoko derrigorrezko hezkuntza ondoko mailetaraino). Itxitako ikasgelen kopurua ikasgela guztien % 1,42 da.

Ostiralean Legebiltzarrean aurrez-aurreko hezkuntzaren aldeko apostua egin zuen Jokin Bildarratz sailburuak. «Une bakoitzen egoera epidemiologikora ahalik eta ondoen egokitzen gara eta, honen bidez, aurrez-aurreko hezkuntzaren aldeko apostu irmoa mantentzen dugu», azaldu du sailburuak. «Dauzkagun neurriak betetzen eta berriak aztertzen eta hartzen ari gara, beti ere adituen gomendioak jarraituz eta adostasuna lortuz», gaineratu zueb Bildarratzek.