233 gela itxita daude koronabirus kasuengatik, atzo baino 30 gehiago

Covid-19aren pandemiak ikastetxeetan duen eraginak okerrera egin du azken egunean. Hezkuntza Sailak iragarri duenez, 233 gela itxita daude koronabirus kasuengatik, atzo baino 30 gehiago. Ikasturteko daturik altuena da. Irailaren 28an ere 233 gela itxi zituzten, hau da, bi urtetik unibertsitatez kanpoko 17.554 eskolen %1,33.

Ostegun honetan Gasteizko Judimendi haur eta lehen hezkuntzako zentroak itxita jarraituko du.

Gabonaz geroztik ikasleen artean ematen ari diren kutsadura kasuen gorakada dela-eta, Osakidetzak familiei eskatu die etxean zuhurtziaz eta zorroztasunezjokatzeko konfinatuta dauden seme-alabekin. Ikastetxe batzuk ohartarazi dute badaudela PCR frogaren emaitza jakin gabe eskolara eramaten dituzten umeak, baita kutsatuta dauden zantzuak dituztenak ere.

Zentzu honetan, gogorarazi dute nahiz eta lehenengo PCR frogaren emaitza negatiboa izan, ezinbestekoa dela hamar eguneko konfinamendua errespetatzea. Etxean itxialdian dauden bitartean ezin dutela bisitarik jaso eta, halan den heinean, gela baten isolatuta egotea gomendatzen die.