Ezezagunak ere baditu izen-abizenak

Ez Vingegaard, ez Evenepoel, ez Roglic. Aurpegi 'ezezagun' askok osatu dute aurten Itzuliaren tropela, eta horrek probaren arrakasta kolokan jarriko zuela aurreikusten zuen zenbaitek. Baina errepide bazterrak betetzen dituzten zaleak ez dira puntako txirrindulariek erakarrita mugitzen, ez gurean –Gaintzako aldapak horren adierazle–. Edozein lasterketak eskertzen du, noski, haien oihartzuna, baina zaleek kirola maite dutela agerian geratu da eta bizikleta gainean doanari, edonor izanda ere, adoreoihuak eskaintzeko prest daudela.

Aldundiko Diputatuen Kontseilua Elgetan elkartu da aste honetan, 12. bilkura ibiltarian. 'Gipuzkoako plazatik Gipuzkoara' lelopean legealdi honetan abian jarri du Diputazioak ekimen hau, erakundea herritarrei gerturatzeko helburuarekin. Bada, bide horretan eman dezakeen edozein urrats positiboa izango da, ingurukoen artean egindako inkesta xumearen arabera, oraindik ere pentsa litekeena baino ezezagunagoa baita gipuzkoarrentzat gurean agintzen duen organoa.

Ezezagunei erreparatzea, haien istorioak lehen planora ekartzea; anonimotasunak balioa kendu diezaien saihestea. Horretan aditua da Ortega y Gasset saria jaso berri duen Mikel Ayestaran, urteak baitaramatza gatazken krudeltasuna zuzenean pairatzen dutenei izen-abizenak eta aurpegiak jartzen. Eguneroko albisteetan entzuten ditugun hildako eta zaurituen zenbakiei bizia emanez, gure kontzientzian ez dezaten pisu bera izan 400, 4.000 edo 40.000 hildakok, zifrak entzutera ohituegi egoteagatik. 'Historias de Gaza' bere azken liburua irakurtzea merezi duen ariketa da.

'Aita Mari' ontzian dabiltzanak ere 'ezezagun' bila abiatzen dira Mediterraneora. Ez dakite nor topatuko duten, zein herrialdetatik ihes egin duen edota zerk bultzatu duen horretara; badakite, ordea, laguntza merezi duten gizakiak aurkituko dituztela eta behin eta berriro itsasoratzera eramaten ditu ideia horrek. Aste honetan, 108 pertsona lehorreratu dituzte Salernon. Mediterraneoan lanean hasi zenetik, 1.522 pertsona bizirik erreskatatzea lortu du ontziak. Denak euren izen-abizenekin, lehorreratzean eta, zenbait Gobernuren ahaleginen poderioz batez ere, berriro ere zenbaki huts bihurtzen direla dirudien arren. Duintasunik eta eskubiderik merezi ez duten zenbakiak, noski.

Marc Suárez-Calvet eta Federica Anastasi. Zientzialariak dira eta alzheimerra odol analisi baten bidez antzemateko proiektuan lanean dihardutelako albiste izan dira. 'Ospe' iragankorra izan ohi da ikerlariena, ordea, eta txalotua izan den aurkikuntza hori kaxoi batean ahaztuta geratzea ere eragiten du tamalez iragankortasun horrek. Ikerbasquek zientzialariak erakartzeko plan bat abian jarri duela jakin dugu aste honetan, Estatu Batuetan jasaten ari diren jazarpenari loturik. Milioika lagunen bizitza aldaraz dezaketen ikerketetan dabiltzanei merezitako ospea emateko gai ez bagara ere, ea lan baldintza duinak bermatzen dizkiegun bederen.

Ezezaguna ez ezik gutxietsia sentitzen omen zen Teresa del Valle bere ibilbidearen hasieran, baita diskriminatua ere. Bere erabakitasuna eta lanaren poderioz, baina, denen aintzatespena lortu zuen asteon zendu den ikerlari eta antropologo donostiarrak. Antropologia feminista Euskal Herrira ekartzen eta hainbat esparrutan genero ikuspegia ezartzen aitzindari, garaiko pentsamendua astinduarazi zuen, besteak beste, ordura arte alboraturiko kontuak mahai-gainean jarriz.

• Temas
• Ciclismo