Umorea nagusi Arnasetik bideosormen lehiaketan saritu dituzten lanetan

Azpeitia, Leitza, Idiazabal, Zarautz eta Berako hainbat sortzaile gaztek jaso zituzten ostiralean Amasa-Villabonako Gurea Antzokian UEMAk, Eusko Jaurlaritzak eta Nafarroako Gobernuak bultzatutako Arnasa Gara ekimenaren barnean antolatutako Arnasetik bideosormen lehiaketako sariak.

UEMAk nabarmendu duenez, «arrakasta handia izan du euskararen arnasguneetako gazteei zuzendutako lehiaketak: euskararen arnasguneetako 10 eta 16 urte arteko gaztetxoek 99 sormen lan aurkeztu dituzte lehiaketara». Lehiaketa irailean abiatu zen, eta ostiraleko galarekin amaitutzat eman badaiteke ere, sarean du segida, bertan baitaude ikusgai lan saritu denak. Eta merezi du lan horiek ikustea eta arnasguneetako gazteek -irabazleetako baten hitzetan «euskararen Amazonia» diren herri euskaldunetakoek, alegia- esateko dutena entzutea, baita nola esaten duten ere. Umorea baliatu dute ia denek, nahiz eta proposamenak denetarikoak izan, bai taldeak eginak, baita bakarkakoak ere...

Arnasetik lehiaketan arnasguneetako ikastetxeek hartu dute parte, bai eta arnasguneetako udalerri txikietako ikasleak jasotzen dituzten zenbait ikastetxe handiagok ere. Kategoria bakoitzeko lan onenek eta publikoaren sariaren irabazleek 500 euroko sariak lortu dituzte, eta sari hori trukean erabili ahal izango dute Irrisarri Land-erako sarreretan, Durangoko Azokako denda birtualean edota EITB-ko Goazen! eta Irabazi arte! telesailen merchandising-ean gastatzeko.

Saria emateko ekitaldian, Iraitz Lazkanok, UEMAko lehendakariak, Arnasa Garak 2019tik gaurdaino egindako bidea errepasatu zuen: «Emankorra izaten ari da, eta emankorra izaten jarraituko du datozen urteotan ere», besteak beste «mezua bateratua izateak asko indartzen duelako arnasguneen garrantziari buruzko adostasun politiko eta soziala». Mikel Arregik, Euskarabidea-Euskararen Nafar Institutuko zuzendari kudeatzaileak ere elkarlanaren garrantzia nabarmendu zuen, eta eskerrak eman zizkion UEMAri «Nafarroan eremu euskaldunean erreferentzia izateagatik»

Eusko Jaurlaritzako Hizkuntza Politikarako Sailburuordetzako Hizkuntza Ikerketa eta Koordinaziorako zuzendari Josune Zabalak «elkarrekin aurrera egin» eta arnasguneetako herritarren ahotsa plazara ekartzeko nahia azpimarratu zuen: «Geure arnasguneak babesten eta indartzen jarraituko dugu gaur hemen zaudetenak gogoan, gure programa honetan parte izan duten guztiak ere bai, eta etorkizunean batuko zaizkigunei begira».

• Temas
• Zabalik