Amaia Telleria idiazabaldarrak 'Haize-lekuak' eleberria argitaratu du

Amaia Telleria idazle idiazabaldarrak 'Haize-lekuak' (Albedania) bere lehen eleberria aurkeztu berri du Donostian. Errenteria Hiria sario jaso eta gero eman du Telleriak eleberrirako jauzia eta horretarako bere amonaren umetako oroitzapenak hartu ditu oinarritzat, «batez ere, historian oharkabean pasatzen diren horien ikuspegitik mundua kontatzeko».

Egilearen hitzetan ez da Gerra zibilari buruzko eleberri bat, baizik eta egoera zail horretan aurrera atera beharra daukan familia eta, bereziki, neskato bati buruzkoa. Hauxe da deskripzioa: «Mikelak supituki utzi beharko du atzean baserriko haurtzaroa, ama alargunak Altsasun entregatzen duen unean. Han, gerra zibilaren itzal eta ilinti bizi-bizien artean, neskame arituko da hamahiru urte apenas dituen neskatoa. Hala egin dute bere aurretik ahizpa zaharrek, hala egingo du berak ere».

Liburua astelehenetik aurrera salgai dago ohiko liburutegietan nahiz sarean. Baina paperezko formatuaz gain, edizio elektronikoan erosteko aukera ere emango dute.