Zegama

Animalia basatiak bilatzeko irteera antolatu du iganderako Anduetza parketxeak

Naturan animalia basatiak ikustea ez da erraza izaten, baina horrek ez du esan nahi ez daudenik. Zentzumenak erne jarriz gero, ingurua animaliek utzitako arrastoz beterik dagoela ohartuko dira Anduetza Parketxeak antolatutako saiora gerturatzen diren bisitariak.

Aztarnak ez ezik, animalia basatiek mota guztietako arrastoak uzten dituzte: gordelekuak, ileak, hezurrak eta bestelako seinaleak. Jarduera honen helburua da aztarna bilatzea eta aurkitzea, baita arrasto txikienak ere. Izan ere, basoan tamaina guztietako animaliak bizi dira.

Ibilbidean zehar, intsektu txikienetatik hasita ugaztun handienetaraino hainbat espezieren bitxikeriak eta arrastoak azalduko dira. Murgisarriko basotxora iritsita, parte-hartzaileek zuhaitz artean ibiltzeko aukera izango dute, astiro eta isilik, ingurunea behatuz eta arrastoen bila.

Familiek seinaleak ezagutzeko aukera izango dute, eta euren herri inguruko natura-guneetan bilaketa praktikan jar dezakete.

Hitzordua igandean izango da, martxoak 30, goizeko 11:00etan. Helduentzako prezioa 6 eurokoa izango da, eta 12 urtetik beherakoentzat 4 eurokoa. Ibilbideak zailtasun pixka bat du Murgisarriko desnibela dela eta; horregatik, 5 urtetik beherakoentzat ez da egokia izango. Izena aurrez ematea derrigorrezkoa izango da, plaza mugatuak baitira.

Aurrez izena ematea beharrezkoa izango da, 943 80 21 87 / 688 62 36 09 telefono-zenbakietan, anduetza@gipuzkoanatura.eus emailera idatzita edo gipuzkoanatura.eus webgunean.