Asier Larruzea izan zen garaile Txindokiko kilometro bertikalean

Eguraldi onaz lagunduta ospatu zen igandean Txindokiko kilometro bertikala. Berrehundik gora korrikalari atera ziren Larraitzko irteeratik Ñañarriko gaineraino dauden 3,6 kilometro zuzenenak, 980 metroko desnibel positiboarekin, ahalik eta denbora gutxienean osatzeko.

Irteera guztiek batera, neutralizatua, egin zuten Gaintzarako bidegurutzeraino, eta hortik aurrera hasi zen lasterketa. Senide, lagun eta ikusle ugari gerturatu ziren ibilbidera parte hartzaileak animatzera. Asier Larruzea izan zen helmugara iristen lehena 35 minutu eta 59 segundotan. Bigarren Mikel Beunza izan zen eta hirugarren Ricardo Cherta. Emakumezkoetan, Oihana Kortazar izan zen garaile, 44 minutu eta bost segundotan, bigarren Ainara Urrutia eta hirugarren Combarieu Maud. Junior mailan, 19 eta 20 urtekoetan, Aitor Ugarte izan zen irabazlea, 38 minututan, bigarren Gaizka Lasa izan zen eta hirugarren Mikel Gonzalez. Jubeniletan, 17 eta 18 urte bitartekoak, Ibai Angulok irabazi zuen 42 minutu eta 14 segundotan, bigarren Julen Bereciartua eta hirugarren Ander Oyarbide.