Beasain

Dena prest Meltxor, Gaspar eta Baltasarren bisitarako

Herriko kaleak magia eta ilusioz jantziko dira igande honetan Erregeen Zamalkadarekin, Atxipi Aisialdi Taldeak eta Udalak elkarlanean antolatutako ekitaldi tradizionalarekin. Goizetik hasi eta iluntzera arte luzatu den egitarauak herriko txikien eta familien parte-hartzea eta emozioa piztu ditu.

Goizean, Errege Magoek Arangoitiko zaharren egoitzan bisita egin dute eta eguerdia inguruan berriz, herriko haurren gutunak jaso dituzte Loinazko San Martin plazan, hauekin tarte bat izanez aurtengo opariak eta eskariak zeintzuk izango diren errepasatzeko. Arratsaldean, berriz, Igartzako Jauregitik abiatu da kabalgata, hiru karrozaz, musikariz eta dozenaka antortxeroz osatutako segizioarekin. Kale Nagusia eta Nafarroa Etorbidea zeharkatu ondoren, plazako ongietorri ekitaldian amaitu da ibilbidea, bertan erregeek hitz batzuk eskaini dituztelarik.

Aurten hainbat berrikuntza izango ditu desfileak, azken bi hamarkadetako egitura berrituz. Gainera, Pello Irizar musikariak moldatutako 'Erregeak Datoz' eta 'Alaken' doinuak, Koskola txarangak eta Musika Bandak interpretatuta, une bereziak eskainiko dituzte. Bidean, 150 kilo gozoki banatu dira, zeliakoentzako egokiak ere bai.

Antolatzaileek eskertu dute parte-hartzaile eta ikusleen babesa kaleetan zehar, eta boluntario berriak animatu nahi izan dituzte hurrengo urteetan tradizio hau mantentzen laguntzeko, desfilean parte-hartzeaz haratago ere, antolakuntzan laguntzeko eta jada lanean jarduten direnei babesa eskaintzeko.