Beasain

«Euskara geurea da, erabili eta biziberritu dezagun denon artean»

Udaletxean egindako ekitaldi batean aurkeztu zuten Aittuko kideek eta herriko hainbat eragilek aurtengo Euskaraldia. Leire Artola alkateak azaldu zuenez, «euskal hiztun guztiak euskara erabiltzea da helburua, gure hizkera ohituretan aldaketa bat sortzea, gurea den hizkuntza erabili eta biziberritzen laguntzeko». Horretarako, herritarrei eta eragileei dei egin zien bakoitzak ahal duen neurrian euskaraz aritzeko.

Aittu elkarteko Patxi Saezek Euskaraldiaren bi berrikuntza nagusi aurkeztu zituen. Lehenik, ekimenaren data aldatu da, aurreko edizioetan udazkenean egin bada ere, aurten udaberrira pasatu da. Bigarren berrikuntza nagusia, 'Hikaldia' Euskaraldiaren barruan txertatzea izan da.

Orain arte bezala, parte-hartzaileek rolak izango dituzte, eta hauek ez dira gaitasunean oinarritzen, baizik eta jarreran. «Ahobizi rola aktiboa da, lehen hitza beti euskaraz egitea eskatzen duena. Belarriprest rola, berriz, pasiboagoa da, batzuetan lehen hitza euskaraz egiten baitu, baina ez beti», azaldu zuen Saezek. Euskaraldian parte hartzen dutenek beren rola adierazteko txapa bat eramango dute, eta aurten entitateak identifikatzeko banderolak eta lanpasak banatuko dira, ikusgarritasuna areagotzeko.

'Hikaldia'-ri dagokionez, parte-hartzaileek txapa berezi bat jasoko dute, erdian 'H' hizkia izango duena. «Ez da derrigorrezkoa izango beti hikaz hitz egitea, baina solaskideari aukera emango zaio berarekin hika hitz egiteko», azaldu zuen Saezek. Gainera, hika ez dakitenentzako Aintzane Agirrebeñak sortutako tresna berri bat aurkeztu zuten: Beasaingo 'hitanoa' lantzeko aplikazio bat.

Beasaingo hitanoa indartzeko, 25 herritarren laguntzarekin 'Appa Hi' izeneko aplikazioa sortu dute. «Jolas moduan hitanoaren oinarriak ikasteko aukera emango du aplikazioak, bost asteko 'ikastaro' baten bidez», azaldu zuen Agirrebeñak. 'Egunean behin' aplikazioaren antzeko formatuan oinarrituko da, baina denborarik gabe. Egunero teoria pixka bat azalduko da, eta horren inguruko galdera sorta bat osatu beharko da. App-a QR kode bidez eskuratu ahal izango da, baita Google Play eta App Store plataformetan ere. Erabat doakoa izango da eta lehiaketak sor-tzeko aukera eskainiko du, lagun edo senideekin aritzeko.

Aittuko kidea den Arantxa Sarriegik 'Irrialdia' programaren barruan antolatutako ekitaldiak aurkeztu zituen. Maiatzaren 9an Zuhaitz Gurrutxagak 'Futbolistok' bakarrizketa eskainiko du Usurbe Antzokian. Euskaraldiaren hasiera ekitaldia maiatzaren 15ean izango da, eta bertan Amaia Bonok 'Belarriprest' izeneko bakarrizketa aurkeztuko du. Hurrengo egunean, maiatzaren 16an, Porrotx eta Marimots pailazoek saio berezia eskainiko dute plazan, haur eta familien gozamenerako.

Maiatzaren 21ean, Segurako Zopa Antzerki taldeak hitanoa sustatzeko antzezlana eskainiko du. Maiatzaren 22an, Imanol Ituñok 'Magiapoteo' izeneko magia ikuskizuna aurkeztuko du pintxopote garaian, herriko tabernetan. Azkenik, maiatzaren 23an, Pantxo Telleria eta Mikel Martinezek 'Ez dok hiru' antzezlana eskainiko dute.

Ekimenaren azken berrikuntza Igor Zurutuzak azaldu zuen. Plazako portikoetan, liburutegiko sarreraren ondoan kokatutako horma-irudia berrituko dute. «EHUn Arte Ederretako master ikasleek diseinuak bidaliko dituzte, eta epaimahai batek hiru onenak hautatuko ditu», aurreratu zuen. Ondoren, DBH eta Batxilergoko ikasleek botoa eman ahal izango dute udaletxean, martxoaren 24tik 28ra bitartean.

Horma-irudia Euskaraldirako prest egotea espero da. Bertan, euskararen aldeko mezua nabarmenduko da: «Gutarik bakoitzak anitz hizkuntza ukan ditzake, euskarak gu baizik ez gaitu».