Bolari onenak Liztormendin

Gipuzkoako Binakako Bola txapelketako finala hartu zuen pasa den larunbat goizean Zeraingo Liztormendi bolatokiak. Gizonezkoetan, 10 bikote lehiatu ziren finaleko lehenengo fasean, eta lauk lortu zuten final handirako pasea: Pedro Agirre-Jon Orikain, Mikel Arroyo-Joxe Mari Etxebeste, Unai Lasa-Joxean Lasa eta Egoitz Berasategi-Jokin Izagirre. Arroyo eta Etxebeste izan ziren trebeenak, atzetik, Berasategi eta Izagirre segurarrak izanik.

Emakumezkoetan, berriz, lau bikote aritu ziren lehen fasean, eta final handia, Aitziber Ugalde-Bea Unzue eta Miren Makatzaga-Garbiñe Alustiza artean izan zen. Aitziber Ugalde eta Bea Unzue bilabonatarrak izan dira txapeldunak azkenean, eta Makatzaga-Alustiza bikote zeraindarrak berriz, bigarren postua lortu zuen.