Idiazabal

'Berpiztu' jaialdiaren lehen edizioa uztailaren 1ean

Idiazabalgo herria eta idiazabaldarrak ez dira geldik egotekoak. Festa giroa eta ospakizunak gustoko dituzte, eta horregatik urtero hainbat azoka, kirol proba eta bestelako ekitaldiak antolatzeko joera dute.

Aurtengoan, egiten direnak gutxi balira, jaialdi berri batekin itzuliko da herriko gazte talde bat. 'Antzar Crew' kultur elkarteak, hilabete luzeko lanketa baten ostean, 'Berpiztu' izenez aurkeztu du uztailari hasiera ezin hobea emateko erabiliko duen jaialdia.

Datorren larunbatean, uztailaren 1ean, ospatuko da Aita Iparragirre herri eskolako patioan 20:00etatik aurrera (jaialdira sartzeko ateak 19:00etan irekiko dira). The Dilingers, Sofokaos, Hell Beer Boys, The Janitors eta Kaleko Urdangak taldeak arituko dira bertan, kartel erakargarria osatuz bere lehen edizio honetan.

Sarrerak salgai daude 16 eurotan Idiazabalgo Odei tabernan, Beasaingo Irizar tabernan, Etxarri Aranatzgo Xapatero tabernan eta enteadium.com web orrian. Egunean bertan 20 eurotan eskuratu ahal izango dira. Gainera, jaialdian bertan afaltzeko aukera ere emango du antolakuntzak.