Bertso afaria eta erromeria gaur Katean

Atzo arratsaldean hasi ziren San Inazio jaiak Idiazabalgo Katean. Ohikoa den moduan, sagardo dastaketak eman zion hasiera jaiari. Herritar asko gerturatu ziren hamabi sagardogileren zukuak probatzera.

Festak jarraipena izango du gaur. 15:30ean hasiko da mus txapelketa, izen-ematea orduerdi lehenago irekiko da. 17:00etan, patata tortilla lehiaketa eta ume jolasak ere egingo dira.

Gaueko 21:00etan, bertso afaria egingo da. June Ayestaran eta Maire Garmendia izango dira bertsolari. Afaritarako, kabrarroka pudinga, pikillo piper beteak, patatak errioxar erara, txahal karrillerak eta hojaldrea izango dituzte. Afariko txartelak, 25 eurotan salgai daude Izpar eta Odei tabernan. Gaurko festari amaiera, Mugi panderoaren erromeriak emango dio.

Bihar, bi zita izango dituzte idiazabaldarrek. Alde batetik, Kateako San Inazio ermitan, meza emango da eguerdiko 12:00etan. Jarraian, Udalak, hamaiketakoa eskeiniko du erromerialekuan.

Bestetik, Gipuzkoa eta Arabako partzuergoak antolatuta, festa izango da Urbian. 11:30ean, meza izango da, 13:00etan artzain txakur lehiaketa eta bazkal aurretik eta ondoren, Ane eta Maialen trikitiariek alaituko dute jaia.

• Temas
• Guipúzcoa