Bideoklip berria kaleratu du Mikel Telleriak idiazabaldarrak

Mikel Telleria musikari idiazabaldarrak, Mediterraneoa zeharkatzen duten pertsonen egoera salatzeko bideoklipa aurkeztu du. Abestia, Aita Mari Itsas Salbamendu Humanitarioko itsasontziari eskainia dago. 'Hala ere'-k gerratik eta miseriatik ihesi Europara datozen pertsonen egoera salatzen du.

Aurreko ostegunean aurkeztu zituen abestia eta bideoklipa Telleriak, Aita Mari Itsas Salbamentu Humanitarioko kide den Izaskun Arriaranekin batera.

Bideoklipean, Gasteizen bizi den idiazabaldarraren eta bere taldearen emanaldiko irudiak eta boluntarioek Aita Mari ontzian egiten duten lana erakusten duten irudiak konbinatzen dira. Bideoklipak, Atera Films banatzailearen eta Nerbio Docs ekoiztetxearen laguntza izan du, eta udazkenean, Gasteizko Sonora disketxearen eskutik aterako duen diska berriko abestietako bat izango da.

Aurretik, bi diska kaleratu ditu Telleriak, 1999an, Deklarazioa eta 2002an, Zaldiak hartuta. Bere hirugarren lana luzea izango da, beraz, udazkenean aurkeztuko duena.