Idiazabal

Landa- lurzoruak mugatzeko prozesua abiarazi du Udalak

Udalak landa-lurzoruen mugaketa topografikoa egiteko prozesua jarri du martxan. Proiektu honek, lehen fasean, udalerriko 13., 14. eta 15. poligonoetan kokatutako 407 lursailak hartuko ditu, guztira 336 hektareako azalera duena. Lan horiek egiteko, Udalak Geograma enpresa kontratatu du, eta helburua da lursailen mugak eta mugarriak zehaztea, akats posibleak zuzentzea eta GPS bidez koordenatuak esleitzea.

Egungo egoerak, jabeei edo oinordekoei lursailen mugez duten ezagutza faltagatik, mugarriak nahastea edo desagertzea eragin du. Horrek, sarritan, mendien eta landa-lursailen zaintza falta dakar, eta horrek ondorio kaltegarriak ditu landa-eremuko ondarean eta ingurugiroan.

Proiektuak aurrera egiteko, lursailen 131 jabe baino gehiagoren elkarlana ezinbestekoa izango da. Jabeek mugak garbitu, mugarriak aurkitu eta mugakideekin adostu beharko dituzte neurketa topografikoak egin aurretik. Prozesu honek ez du inolako gastu ekonomikorik eragingo jabeei, baina mugak eta mugarriak ondo zehaztea ezinbesteko baldintza izango da.

Behin neurketak eginda, jabeei markatutako mugak eta GPS koordenatuak jasotzen dituzten planoak entregatuko zaizkie. Plano horiek katastroko datuak eguneratzeko ere balioko dute, beharrezkoa izanez gero. Hala ere, mugakide guztien adostasunik gabe, lanak ezin izango dira gauzatu.

Lursailen jabe guztiek proiek-tuaren azalpenak jasoko dituzte azaroaren 27an Guraso Elkartean egingo den bileran. Bertan, prozesuaren xehetasunak azalduko dira eta Udalak herritarren parte-hartzea eta lankidetza eskertuko ditu.

Udalak nabarmendu du proiektu hau oso garrantzitsua dela udalerriko landa-lurzoruen antolamendurako eta etorkizunean bestelako poligonoak ere mugatzeko konpromisoa hartu du. Landa-eremua zaindu eta herritarren arteko lankidetza sustatzea proiektu honen helburu nagusiak dira.