Jendetza Ikaztegietako plazan egin zen Euskal Azokan

Produktu aukera zabalarekin ospatu zen atzo IX. Euskal Azoka Ikaztegietako plazan. Bi urtez behin antolatzen den feriak bisitari ugari erakarri zituen elikadura, arropa, liburuak zein udaberriko landareak ikusi eta erosteko. Giro ederra izan zen goiz guztian, eguraldi ona lagun. Pako Belea konpartsako buruhandi eta erraldoiek egin zuten irekiera eta eguerditik aurrera Kuxkuxtu txarangak alaitu zuen giroa. Gainera, herri bazkaria ere egin zuten lehen aldiz eta, bazkalondoren, Kuxkuxturekin jarraitu zuen festak.