Kantu-eske herrikoia antolatu du Txintxarri abesbatzak Santa Ageda bezperarako

Txintxarri Abesbatza kultur elkarteak Kantu Eske Herrikoia antolatu du Santa Ageda bezperarako. Abesbatza urtero ateratzen da santa eskean egun horretan eta aurtengoan kanturako gogoz dauden herritar guztiei parte hartzeko gonbitea egiten diete, gabonetan egin zen moduan.

Abesbatzarekin batera herriko bertsolariak eta soinujoleak ere izango dira santa eske egun horretan. Guztia ondo prestatzeko, urtarrilaren 26an, osteguna, entsegu orokor bat egingo da 20:00etan kultur etxean eta kantuan atera nahiko luketen guztiei bertaratzeko deia egiten zaie.

Datorren ostiralean, urtarrilaren 27an, Ekain Pailazoak 'Aho bete hortz' ikuskizuna eskainiko du zinean, haurrei zuzendua. Ekitaldia 17:00etan hasiko da eta pailazo, malabarista eta aktore azpeitiarrak txikienak aho zabalik uzteko moduko emanaldia eskainiko du.

Ikuskizunerako sarrerak bihar astelehena, urtarrilaren 23a, jarriko dira salgai kultur etxean hiru euroko prezioan.

• Temas
• Alegia